Navigation

Inhaltsbereich

  • Erste Mitteilung
  • Neuen Beitrag einfügen

La Regenza ha deliberà la missiva davart la refurma da las dretgiras 3. En quella propona ella da fusiunar la Dretgira chantunala e la Dretgira administrativa a la Dretgira superiura dal chantun Grischun, d'optimar la surveglianza giudiziala sco er da precisar la relaziun d'engaschament da las commembras e dals commembers da las autoritads giudizialas. Il project cumpiglia er ina revisiun parziala da la Constituziun dal chantun Grischun. Quella vegn suttamessa a la votaziun dal pievel grischun previsiblamain ils 27 da november 2022.

En la sessiun da zercladur 2019 ha il Cussegl grond decidì da fusiunar la Dretgira chantunala e la Dretgira administrativa a la Dretgira superiura dal chantun Grischun. La Dretgira superiura vegn ad esser cleramain pli gronda che la Dretgira chantunala respectivamain la Dretgira administrativa. Perquai ston vegnir stgaffidas novas structuras per la Dretgira superiura tant en il sectur da la giurisdicziun sco er en il sectur da l'administraziun giudiziala. Questa occasiun duai vegnir nizzegiada per installar in secretariat general. En l'avegnir duai il secretariat general liquidar las incumbensas administrativas tenor las instrucziuns dals organs directivs da la Dretgira superiura. Uschia duain las derschadras ed ils derschaders sco er l'actuariat pudair sa concentrar pli fitg sin la giurisdicziun.

Structuras modernas per la giustia grischuna
Plinavant duai vegnir optimada la surveglianza giudiziala, e per las commembras ed ils commembers da las autoritads giudizialas duain vegnir stgaffidas structuras modernas che duain garantir a la populaziun ina giurisdicziun effizienta sco er optimala en quai che reguarda la materia ed il persunal. Tras la refurma da las dretgiras 3 duain la finala vegnir realisads ils ulteriurs conclus da princip ch'il Cussegl grond aveva prendì en la sessiun da zercladur 2019 areguard l'organisaziun da las dretgiras chantunalas superiuras.

Proxims pass
La refurma da las dretgiras 3 vegn suttamessa en la sessiun da zercladur 2022 al conclus dal Cussegl grond, a medem temp sco la missiva da construcziun «Fusiun da las localitads da las duas dretgiras chantunalas superiuras ad ina nova Dretgira superiura – renovaziun ed engrondiment da l'edifizi chantunal, Grabenstrasse 30 a Cuira». Davart quest project da construcziun sco er davart la revisiun parziala da la Constituziun chantunala, che furma il cuntegn da la refurma da las dretgiras 3, vegn il pievel grischun a pudair decider ils 27 da november 2022, uschenavant ch'il Cussegl grond approvescha ils projects respectivs.

Agiunta:

missiva

Infurmaziuns:

cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch (cuntanschibel da las 13.00 fin las 14.00)


Responsabladad: Regenza

Neuer Artikel