Ils Special Olympics World Winter Games Switzerland 2029 duain vegnir organisads en il Grischun. Las concurrenzas per persunas cun impediments spiertals duain avair lieu a Cuira, ad Arosa ed a Lai. Per quest intent ha la Regenza deliberà per mauns dal Cussegl grond la missiva per approvar ina contribuziun chantunala da 9,5 milliuns francs.

Ils Special Olympics World Winter Games Switzerland 2029 han lieu dals 10 als 17 da mars 2029. Durant sis dis da concurrenza participeschan persunas cun impediments spiertals a nov differentas disciplinas da sport a Cuira, ad Arosa ed a Lai. La festa d'avertura ha lieu en il stadion Letzigrund a Turitg. Tut las concurrenzas vegnan realisadas en il Grischun.

Eveniment cun attracziun internaziunala per l'emprima giada en Svizra
Ils World Winter Games valan suenter ils gieus olimpics d'enviern sco l'occurrenza da sport d'enviern la pli gronda dal mund. Decisiv per quai èn la durada (12 dis cun program accumpagnant), il dumber da participantas e participants sco er da coachs (var 3100) ed il dumber da naziuns (passa 100). Ils World Winter Games han lieu dapi l'onn 1977 mintga quatter onns. En la Svizra n'èn els anc mai vegnids organisads.

Il fanadur 2021 ha Special Olympics International surdà ils World Winter Games 2029 a la Svizra. Quai sut la cundiziun che la finanziaziun da l'occurrenza saja garantida fin l'atun 2022. Il comité d'organisaziun fa quint cun custs da 38 milliuns francs per l'occurrenza.

Il respect e la stima envers persunas cun impediments en il focus
Cun ina contribuziun chantunala da maximalmain 9,5 milliuns francs na vul la Regenza betg mo sustegnair in'occurrenza da sport d'enviern internaziunala, mabain er rinforzar las stentas da blers onns per l'egualitad da persunas cun impediments. Ils Special Olympics World Winter Games 2029 èn in battavia impurtant per l'inclusiun e per l'egualitad da persunas cun impediments en Svizra. Ultra da la participaziun sportiva activa pon persunas cun impediments appurtar lur cumpetenzas er en la planisaziun dal project ed en la realisaziun. Avant e suenter l'occurrenza gronda profiteschan ellas da differentas mesiras accumpagnantas che vegnan realisadas dal comité d'organisaziun e da differentas instituziuns che s'engaschan per l'egualitad da persunas cun impediments.

Posiziunar il Grischun sco ospitant simpatic
Cun la contribuziun als custs da l'occurrenza vul la Regenza posiziunar il chantun Grischun en il sectur turistic e sociopolitic sco ospitant simpatic. Ils World Winter Games èn per il Grischun en differents reguards in gudogn: els procuran tant per stima e per inclusiun da persunas cun impediments sco er per creaziun da valurs turisticas. Instituziuns socialas en il chantun Grischun pon vegnir resguardas tar la surdada d'incaricas e survegnan uschia sustegn. Ultra da la valurisaziun turistica cun var 40 000 pernottaziuns rinforzan ils World Winter Games la collavuraziun cun il chantun Turitg e cun la citad Turitg. L'occurrenza è in gudogn duraivel per il Grischun ed ina investiziun rentabla en il futur dal chantun Grischun.

Agiuntas:

Missiva

«Il pli impurtant en furma concisa» en lingua simpla

Fotografias agiuntadas:

Fotografia 2, Fotografia 3, Fotografia 4

Fotografia: PPR/Special Olympics Switzerland/Martin Nitsch

Infurmaziuns:

Responsabladad: Regenza