L'edifizi chantunal a la Grabenstrasse a Cuira duai servir sco nova sedia giudiziala a la Dretgira superiura ch'è vegnida stgaffida en il rom da la refurma da la giustia. Per quest intent sto l'immobiglia istorica dal chantun vegnir renovada a moda cumplessiva ed engrondida cun in edifizi cumplementar. Ils custs d'investiziun importan circa 29,2 milliuns francs.
Actualmain ha la Dretgira chantunala sia sedia a la Poststrasse en l'immobiglia istorica en locaziun «Altes Gebäu». La Dretgira administrativa sa chatta a la Obere Plessurstrasse en il «Haus Brunnengarten» ch'è en proprietad dal chantun. Il sboz da la refurma da las dretgiras prevesa da reunir organisatoricamain e localmain la Dretgira chantunala e la Dretgira administrativa ad ina Dretgira superiura. Tenor la voluntad dal Cussegl grond duai vegnir mess a disposiziun per quest intent l'edifizi chantunal a la Grabenstrasse 30 che vegn actualmain utilisà da l'administraziun centrala da l'Uffizi da construcziun bassa.
Edifizi chantunal d'impurtanza istorica
L'edifizi chantunal ch'è vegnì construì ils onns 1877/1878 a Cuira tutga – ensemen cun la Chasa grischa – tar in dals edifizis ils pli represchentativs ch'èn en proprietad dal chantun. Ord vista da la politica da stadi ed ord vista da la cultura da construcziun è l'edifizi istoric da gronda impurtanza. El fa part da l'inventari central inalienabel da las immobiglias chantunalas. L'edifizi ch'è oriundamain vegnì construì sco sedia dal Cussegl grond, da la Banca Chantunala Grischuna e da la Dretgira chantunala dat dapi ils onns 1960 suttetg a l'administraziun centrala da l'Uffizi chantunal da construcziun bassa.
Tras renovaziuns da pli baud, en spezial en il rom da l'ultima midada d'utilisaziun per intents administrativs, ha l'edifizi pers bler da sia substanza originala preziusa. La construcziun da paraids internas sco er il palantschieu intermediar massiv ch'è vegnì plazzà en l'anteriura sala dal Cussegl grond e che la divida en dus plauns han midà il caracter da l'edifizi en moda persistenta. La nova utilisaziun previsa da l'edifizi chantunal sco sedia da dretgira è in'occasiun adattada per manar enavos grondas parts da l'edifizi d'impurtanza istorica a ses intent originar. A medem temp duai vegnir modernisada la tecnica da chasa, meglierada la statica architectonica sco er optimadas energeticamain diversas parts da l'edifizi.
Project da construcziun cun tract nov
La situaziun da spazi existenta da l'edifizi chantunal sco tala na tanscha betg per il manaschi da las duas dretgiras chantunalas che vegnan fusiunadas en il futur. In tract nov cun biros da team duai stgaffir spazi supplementar per lieus da lavur ed a medem temp dar distgargia a l'inventari istoric da l'edifizi chantunal. Uschia vegni er pussibilità da reconstruir la veglia curt interna e l'anteriura sala dal Cussegl grond che ha ina valur istorica e che s'extenda sin dus plauns.
L'elavuraziun dal project da construcziun è vegnida surdada al team victur d'ina procedura publica da selecziun da planisaders, numnadamain ad «Aebi & Vincent Architekten AG» da Berna ensemen cun «Fanzun AG Architekten Ingenieure Berater» da Cuira.
Ils custs totals per las mesiras architectonicas importan en total circa 29,2 milliuns francs. Da quels van var 16 milliuns francs a favur da la restauraziun e dal rinforzament da la substanza architectonica existenta. Las mesiras respectivas èn necessarias a media vista, e quai independentamain da la refurma da las dretgiras.
Project dependent da la refurma da las dretgiras
Pervia da la colliaziun dal project da construcziun cun la refurma da las dretgiras èsi previs da suttametter quests dus projects al Cussegl grond en la sessiun da zercladur e suenter ses conclus a las votantas ed als votants grischuns per la votaziun dals 27 da november 2022. Sch'il pievel ed il parlament approveschan ils projects, vegnan las lavurs da construcziun a cumenzar la primavaira 2023 ed il manaschi da dretgira duai pudair entschaiver mez da l'onn 2025. Perquai che la nova Dretgira chantunala prenda domicil en l'edifizi chantunal, poi vegnir renunzià a l'immobiglia en locaziun a la Poststrasse, ed il «Haus Brunnengarten» po vegnir vendì al martgà. L'administraziun centrala da l'Uffizi chantunal da construcziun bassa mida ad interim chasa en edifizis ch'èn en proprietad dal chantun a la Loëstrasse a Cuira.
Fotografia agiuntada:
Agiuntas:
Infurmaziuns:
Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch (cuntanschibel da las 10.00 fin las 11.00)
Responsabladad: Regenza