Navigation

Inhaltsbereich

  • Erste Mitteilung
  • Neuen Beitrag einfügen

A chaschun d'ina scuntrada da lavur ha la Regenza dal chantun Son Gagl retschavì la Regenza grischuna a Berneck. La sentupada dad oz ha purschì l'occasiun per discutar divers temas politics d'interess cuminaivel.

La Regenza da Son Gagl sut la direcziun dal president da la Regenza Marc Mächler ha beneventà oz la Regenza grischuna per in inscunter da lavur en il «Haus des Weins» a Berneck. A la delegaziun da Son Gagl han er fatg part las cusseglieras guvernativas Laura Bucher e Susanne Hartmann sco er ils cussegliers guvernativs Bruno Damann, Stefan Kölliker, Beat Tinner, Fredy Fässler ed il secretari da stadi Benedikt van Spyk. L'inscunter dad oz dat perditga da las relaziuns excellentas tranter ils dus chantuns.

Barat politic multifar
En il decurs dals discurs politics èn las duas regenzas sa barattadas davart numerus temas d'interess cuminaivel. En quest connex èn stadas en il center dal barat las dumondas davart la medischina fermamain spezialisada sco er davart la collavuraziun tar projects dad IT en il sectur da la cultura. Plinavant han las regenzas discutà davart ils temas «Sportvision Ost, Campus Svizra Orientala» sco er davart ulteriurs temas da la collavuraziun transcunfinala tranter il chantun Son Gagl ed il Grischun.

Ultra dal discurs da lavur è stada sin il program er ina guida tras la chasa dal vin da Son Gagl. Sco finiziun ha gì lieu ina tschaina cuminaivla da las duas delegaziuns.

Fotografia agiuntada:

Foto Arbeitsbesuch Sankt Gallen

©Chanzlia chantunala dal chantun Son Gagl

Infurmaziuns:

President da la Regenza Marcus Caduff, schef dal departament d'economia publica e fatgs socials, e‑mail Marcus.Caduff@dvs.gr.ch


Responsabladad: Chanzlia chantunala

Neuer Artikel