La cumissiun ad hoc dal Cussegl grond ha predeliberà la missiva tar la construcziun d'ina nova basa da la Polizia da traffic da la Polizia chantunala a Cuira. Ella sustegna unanimamain il project da construcziun da caracter exemplaric.
Sut la direcziun dal president da la cumissiun Patrik Degiacomi ha la cumissiun predeliberanta laschà explitgar il cumandant da polizia Walter Schlegel e l'architect chantunal Markus Dünner la nova basa previsa da la Polizia chantunala a Cuira per la Polizia da traffic. Per l'ina è sa mussada la necessitad d'ina tala basa ord vista da l'organisaziun sco er ord vista poliziala e per l'autra ha la cumissiun pudì sa persvader da la commensurabladad da la realisaziun architectonica. La nova basa previsa custa la finala 9,8 milliuns francs.
Project exemplaric en il sectur da l'architectura persistenta
La basa da la Polizia da traffic duai valair sco exempel extraordinari d'edifizis persistents e progressivs. Ella surpassa las mesiras ed ils standards ch'èn sa cumprovads e sa qualifitgescha tras schanegiar las resursas, diminuir la grevezza per l'ambient e promover la biodiversitad. Er aspects da la construcziun e dal manaschi netto nulla, low-tech e producziun d'electricitad solara vegnan integrads. E la persistenza considerescha l'entir ciclus da vita da l'edifizi: projectaziun, construcziun, gestiun e renatiralisaziun. Cumplettamain en il senn dal plan d'acziun «Green Deal».
En la cumissiun èsi stà incontestà che las duas basas da Polizia da traffic, quella da Tusaun e quella da la Ringstrasse a Cuira, duessan fusiunar. Per motivs da l'organisaziun e dal manaschi saja raschunaivel da las transferir en in nov edifizi tar l'access a la via naziunala A13 a Cuira Sid. Medemamain ha la cumissiun sustegnì cumplainamain la moda e maniera da la realisaziun dal project. Ella propona unanimamain al Cussegl grond d'acceptar il project e da l'approvar.
Il Cussegl grond vegn a tractar questa fatschenta en la sessiun d'avrigl 2022. Sch'el dat ses consentiment, vegn il conclus suttamess al referendum da finanzas facultativ.
Infurmaziuns:
President da la cumissiun Patrik Degiacomi, tel. +41 79 260 58 06
Responsabladad: Cussegl grond / cumissiun predeliberanta ad hoc