Navigation

Inhaltsbereich

  • Erste Mitteilung
  • Neuen Beitrag einfügen

Il turissem è in factur economic impurtant en il chantun Grischun. In studi davart la creaziun da valur tras il turissem duai documentar numericamain questa impurtanza. Per quest intent vegnan questa stad ed il proxim enviern interrogads giasts, persunas indigenas, manaschis sco er possessuras e possessurs d'abitaziuns secundaras.

Danunder vegnan ils giasts che visitan il chantun Grischun? Quant ditg restan els? Per tge chaussas spendan els daners? Quantas plazzas da lavur stattan directamain ed indirectamain en connex cun il turissem? Per il svilup dal turissem en il chantun èn quai dumondas fundamentalas. Fin ussa na datti dentant naginas cifras fidadas e cumparegliablas sin plaun regiunal per las respostas. Quai vegn ussa a sa midar. Per incumbensa da l'Uffizi per economia e turissem elavura la firma EBP, Turitg, in studi cumplessiv davart la creaziun da valur e davart l'occupaziun en il turissem dal chantun Grischun.
Il studi ha la finamira da mussar l'impurtanza economica dal turissem e ses entretschament cun l'economia regiunala. En il rom dal studi davart la creaziun da valur vegnan analisadas individualmain tut en tut 15 differentas regiuns turisticas dal chantun, quai per obtegnair resultats cumparegliabels sin plaun regiunal e sin plaun chantunal.

Prender part a l'enquista e gidar uschia il turissem
Il zercladur 2022 vegn lantschada in'enquista dals giasts, che duai infurmar davart la structura dals giasts e davart las expensas dals turists dal di e quellas dals giasts da pernottaziun. Intervistadras ed intervistaders ch'enconuschan bain il lieu, vegnan a far var 20 000 intervistas curtas cun ils giasts da la Svizra e da l'exteriur durant la stagiun da stad, che dura dal zercladur fin l'october 2022, sco er durant la stagiun d'enviern, che dura dal december 2022 fin l'avrigl 2023. Er persunas indigenas vegnan interrogadas, perquai ch'ellas fan diever dals spazis da recreaziun dal chantun durant lur temp liber. La primavaira 2023 survegnan er manaschis turistics l'invitaziun d'emplenir in questiunari online. Ultra da quai vegnan a vegnir interrogads er tscherts manaschis d'autras branschas, che han – sin l'emprima egliada – ina relaziun minimala cun il turissem. La terza gruppa impurtanta per las analisas èn las numerusas possessuras ed ils numerus possessurs d'abitaziuns secundaras en il chantun. Er questas persunas vegnan envidadas ad in'enquista durant la stad e durant la stagiun d'enviern 2022/2023, quai per registrar las infurmaziuns impurtantas davart lur effects per il turissem.
Las enquistas da la vart da las purschidas e da la vart da las dumondas duran fin la stad 2023. Per survegnir in maletg uschè cumplet e correct sco pussaivel vegni appellà a tut las persunas ed a tut ils manaschis interrogads da sa prender temp per sa participar a las intervistas. Ils resultats da l'analisa vegnan ad esser avant maun la fin da l'onn 2023.

Tschertgds intervistadras ed intervistaders
Per che l'enquista dals giasts possia vegnir realisada sco planisà vegnan ad esser en acziun pliras intervistadras e plirs intervistaders en tut las regiuns dal chantun. La firma incumbensada EBP tschertga perquai persunas che fan gugent intervistas cun giasts als hotspots turistics sco er a chaschun d'events turistics. La purschida da quest job salarisà sa drizza a tut las persunas sur 17 onns che han plaschair da lavurar regularmain al liber. Las persunas che han interess per questa activitad flexibla, pon s'annunziar sin befragungen@ebp.ch. Las intervistadras ed ils intervistaders vegnan preparads en ina scolaziun accuratamain per lur incumbensa. Ellas ed els pon eleger en moda flexibla lur acziuns en la regiun giavischada.

Agiunta: 

Inserat da la plazza d'ina/in intervistadra u intervistader

Infurmaziuns:

Luzius Stricker, manader da la partiziun Satistica e registers, Uffizi per economia e turissem, tel. +41 81 257 23 74, e‑mail Luzius.Stricker@awt.gr.ch


Responsabladad: Uffizi per economia e turissem

Neuer Artikel