L'occurrenza da «trampolin» Grischun è in'occurrenza da carriera extraordinaria: Entrar en contact cun interpresas dal chantun Grischun ed obtegnair – cun ina visita en las interpresas – ina meglra basa da decisiun per l'entrada en la vita professiunala. A chaschun da l'occurrenza da «trampolin» Grischun vegnan var 80 studentas e students a profitar da questa schanza.
L'Uffizi per economia e turissem sco er l'Uffizi per la furmaziun media-superiura organiseschan ensemen cun la Scola auta spezialisada dal Grischun l'occurrenza da «trampolin» Grischun. Quest onn ha lieu l'occurrenza da «trampolin» glindesdi, ils 25 d'avrigl 2022. Uschia survegnan interpresas grischunas sustegn per recrutar spezialistas e spezialists ed a las studentas ed als students vegnan mussadas las diversas pussaivladads captivantas da lavurar en il Grischun. Mintga onn profitan var 80 studentas e students da scolas autas e d'universitads da l'entira Svizra da la pussaivladad d'emprender d'enconuscher las differentas interpresas grischunas sco patrunas.
In effect da win-win per tut las participantas ed ils participants
A l'occurrenza da «trampolin» Grischun survegnan las interpresas la pussaivladad da dar a las studentas ed als students da bachelor e da master cun la direcziun da studi giavischada ina invista persunala da lur interpresa. Uschia entran ellas en contact cun spezialistas e spezialists futurs e pon sa preschentar sco patrunas attractivas. Ellas emprendan d'enconuscher persunalmain las studentas ed ils students, entant che quellas e quels obtegnan ina invista unica da las interpresas. Suenter las visitas en las interpresas datti in talent-apero en l'auditori da la Banca Chantunala Grischuna a Cuira. Là han las interpresas participantas la pussaivladad da sa barattar cun las studentas ed ils students en in'atmosfera patgifica.
Quest onn sa participeschan las suandantas interpresas a l'occurrenza: Academia Raetica, AFRY, CSEM, EMS-CHEMIE SA, Banca Chantunala Grischuna (sponsura principala da l'occurrenza), Hamilton Bonaduz SA, Inventx SA, Landqart SA, Viafier retica SA e VZ VermögensZentrum SA.
Ins po anc s'annunziar
L'occurrenza da «trampolin» Grischun ha lieu glindesdi, ils 25 d'avrigl 2022, ed è ina da tut en tut 8 occurrenzas da «trampolin» en Svizra. Studentas interessadas e students interessads pon anc s'annunziar per l'occurrenza da «trampolin» sut www.sprungbrett-events.ch.
Ulteriuras infurmaziuns chattais Vus sin la pagina d'internet davart il Grischun sco lieu da lavurar e d'abitar.
Infurmaziuns:
Beatrice Koller, manadra dal project Svilup da l'economia locala, Uffizi per economia e turissem, tel. +41 81 257 30 86, e‑mail Beatrice.Koller@awt.gr.ch
Responsabladad: Uffizi per economia e turissem