Da princip è la Regenza s'exprimida a favur dal project davart la realisaziun da la taglia minimala da la OECD, ch'il Cussegl federal aveva dà en consultaziun. Per concerns cun in'orientaziun internaziunala che han svieutas annualas da pli che 750 milliuns Euros vegn introducida ina taglia minimala da 15 pertschient. Per il cumenzament da l'onn 2024 garantescha il proceder dal Cussegl federal – cun agid d'ina taglia cumplementara – ch'il substrat fiscal per quests concerns vegn vinavant suttamess a la taglia en Svizra e betg a l'exteriur. Las autras interpresas sco las interpresas pitschnas e mesaunas (IPM) n'èn betg pertutgadas da questa taglia cumplementara. Per ellas restan mantegnidas l'autonomia fiscala chantunala e la concurrenza fiscala interchantunala.

Per realisar questa imposiziun minimala da taglia sco er per duvrar ils eventuals retgavs da taglia è ina regulaziun accordada sin plaun interchantunal d'impurtanza centrala. La Regenza sustegna la Posiziun da las directuras e dals directurs chantunals da finanzas (CDF). Areguard ils eventuals retgavs da l'imposiziun supplementara existan grondas malsegirezzas. Quai vala particularmain a media ed a lunga vista resguardond las adattaziuns dal cumportament da las gruppas d'interpresas pertutgadas. En la cumparegliaziun internaziunala perda la Svizra tendenzialmain sia attractivitad fiscala. Pertutgant il diever d'eventualas entradas supplementaras èsi pia d'agir cun ina fitg gronda retegnientscha. Las taglias cumplementaras èn chaussa dals chantuns e duain vegnir duvradas en emprima lingia per augmentar l'attractivitad dal lieu.

Agiunta: Communicaziun a las medias da la CDF

La Regenza ha approvà la revisiun parziala da la planisaziun locala che las vischnancas da San Murezzan (11 da november 2018) e da Silvaplauna (29 da november 2018) avevan concludì. Tras quai ha ella stgaffì las premissas planisatoricas per realisar in indriz d'ennavar per la «pista dal Lej dals Chöds» (Gian d'Alva – San Murezzan Bogn) sin il territori da skis Corvatsch.

La revisiun da la planisaziun locala cuntegna per l'ina las surfatschas ennavadas sin la pista da var 4,5 kilometers lunghezza e per l'autra las installaziuns cunvegnentas. Concretamain èn previs – sin ina lunghezza da tut en tut 4,7 kilometers – conducts d'aua e conducts d'aria cun circa 57 spinas sco er ina surfatscha ennavada supplementara da var 58 000 meters quadrat. La pista existenta dal «Lej dals Chöds» na vegn betg adattada. Las lantschas da naiv che vegnan duvradas per ennavar duain vegnir montadas mintgamai da la fin da settember fin mez schaner e lura puspè vegnir demontadas.

Per l'onn 2022 ha la Regenza concedì contribuziuns chantunalas da maximalmain 638 900 francs per renovar mirs sitgs. En connex cun las cunvegnas da program «cuntrada» e «natira» sa participescha er la Confederaziun cun sias parts fixas da 331 000 francs a la finanziaziun. Var 936 000 francs dals custs totals dad 1,9 milliuns francs per il project vegnan plinavant finanziads tras atgnas prestaziuns e tras terzs.

Durant l'onn 2022 duain vegnir renovads mirs sitgs d'ina lunghezza da tut en tut circa 2,7 kilometers en las vischnancas dad Alvra, Andeer, Arosa, Bever, Bravuogn Filisur, Brusio, Calanca, Farera, Landquart, Lavin, Luzein, Malans, Mesauc, Muntogna da Schons, Poschiavo, Rossa, Samedan, Sta. Maria Val Calanca, San Vittore, Scharàns, Scuol, Soazza, Sumvitg, Surses, Tschappina, Tumleastga, Val Müstair, Valragn, Val S. Pieder, Valsot, Val Stussavgia, Vaz, Zizers e Zernez. Sco mirs da cunfin e da sustegn èn ils mirs sitgs en bleras regiuns dal Grischun perditgas impurtantas d'ina cultivaziun tradiziunala. Plinavant furman els savens spazis da viver impurtants per reptils, per mammals pitschens e per insects ed han savens ina flora interessanta (litgens, mistgels, ervas). Els n'han uschia betg mo ina gronda impurtanza per l'istorgia culturala, mabain er per l'ecologia e per la cuntrada.