Las structuras communalas en il Grischun èn vegnidas fermamain en moviment ils ultims onns. Tras numerusas fusiuns da vischnancas è il dumber da vischnancas grischunas sa reducì durant ils ultims 25 onns da 212 a 101. Suenter l'onn 2017 fa la Regenza ussa danovamain in'analisa da la situaziun.
L'onn 2017 ha il chantun ensemen cun la Scola auta spezialisada dal Grischun (SAS) manà tras l'emprima enquista da la populaziun davart las fusiuns da vischnancas, quai sco element da la «Controlla da las fusiuns I». Cun l'instrument «Controlla da las fusiuns», ch'è sa cumprovà er pliras giadas en auters chantuns, èn ils effects da las 27 fusiuns da vischnancas vegnids analisads en moda cumplessiva. Ils resultats èn vegnids integrads en l'emprim Rapport davart las structuras communalas (missiva carnet nr. 8/2018–2019).
Analisa da l'effect a lunga vista
Suenter tschintg onns è la Regenza da l'avis, ch'i saja temp per in'ulteriura analisa da la situaziun. Il chantun e la SAS prendan puspè cuminaivlamain questa via. En la «Controlla da las fusiuns II» vegnan examinadas per la segunda giada las 27 fusiuns da vischnancas da la «Controlla da las fusiuns I», per survegnir resultats davart l'effect a media fin a lunga vista da las fusiuns da vischnancas. Supplementarmain vegnan analisadas set ulteriuras vischnancas che han fusiunà durant ils ultims 5 onns. Ultra da las indicaziuns da l'administraziun communala sco er da l'evaluaziun da las datas publicas da statistica e da finanzas èsi per la Regenza er impurtant, che la populaziun da las vischnancas fusiunadas vegnia a pled.
En il rom d'ina nova retschertga survegnan quests dis tut las persunas cun dretg da votar da tut las 34 vischnancas pertutgadas la pussaivladad d'exprimer lur opiniun. Pli persunas che fan diever da questa schanza e pli expressivs ch'ils resultats vegnan ad esser. Ils resultats da la «Controlla da las fusiuns II» vegnan integrads en il Rapport davart las structuras communalas II che la Regenza elavura per mauns dal Cussegl grond.
La Regenza supplitgescha la populaziun da sa participar activamain a l'enquista e da prestar uschia ina contribuziun essenziala per il success da quest project. Ella engrazia a la populaziun per ses engaschi.
Infurmaziuns:
Responsabladad: Departament da finanzas e vischnancas