Cun ina retscha da dis d'aventura multifars vul l'Uffizi da guaud e privels da la natira (UGP) onurar il guaud sco multitalent e l'avischinar a visitadras e visitaders interessads. Ils dis vegnan lantschads sonda proxima a Tumein.
La valur dal guaud è fitg gronda, cunzunt en il Grischun sco chantun da muntogna. Il guaud protegia cunter privels da la natira sco per exempel crudada da crappa e lavinas, furnescha laina, è spazi da viver per nundumbraivlas spezias d'animals e da plantas e porscha conturns sauns a persunas indigenas ed a giasts da vacanzas per activitads da temp liber recreativas.
Far enconuschent la rolla dal guaud tras il gieu
Grond e pitschen vegnan envidads da scuvrir activamain il guaud. Grazia a las numerusas partenarias ed als numerus partenaris pon ins laschar experimentar sin in tur in vast spectrum da la fascinaziun dal guaud. Ultra dal UGP e da las autoritads communalas coopereschan activamain la SELVA, l'Associaziun dals proprietaris da guaud dal Grischun, e Grischun lain. Purschidas vegnan attracziuns sco per exempel talas davart il tema professiuns forestalas.
Exempel guaud da protecziun
Sin il tur vegn demonstrada a maun d'in model crudada da crappa e l'effect da franar da las plantas. Senza il guaud da protecziun che fraina las crudadas da crappa, fissan periclitads numerus edifizis en il chantun. Per che l'effect da franar vegnia mantegnì ston ils guauds da protecziun vegnir cultivads e regiuvinads regularmain. Co che quai va, decleran las expertas ed ils experts al lieu.
Midada dal clima e sias consequenzas
La midada dal clima n'occupa la branscha forestala betg pir dapi ier. Durant il di d'aventura vegnan expertas ed experts a mussar, tge consequenzas ch'il clima che daventa pli e pli chaud e pli sitg, ha sin il guaud dal Grischun e sin las singulas spezias da plantas.
Inaugurà uffizialmain vegn l'emprim di d'aventura sonda, ils 7 da matg 2022, a las 11.30 en l'ustaria da festa «Schützenhaus» cun pleds dal cusseglier guvernativ Mario Cavigelli, dal president communal Martin Wieland e da Lukas Kobler, substitut dal manader dal UGP. Ils ulteriurs dis d'aventura davart il guaud sco multitalent han lieu quest onn ils 11 da zercladur a Tusaun, ils 9 da fanadur a Tavau ed ils 29 d'october a Glion sco er l'onn proxim ils 3 da zercladur a Poschiavo.
Ulteriuras infurmaziuns davart ils dis d'aventura e davart il guaud dal Grischun stattan a disposiziun sin la pagina d'internet www.multitalentwald.ch.
Fotografia agiuntada:
Reservat da guaud spezial «Eichwald» a Tumein
Infurmaziuns:
Antonio Crisci, manader dals Servetschs centrals, Uffizi da guaud e privels da la natira, tel. +41 81 257 38 54, e-mail Antonio.Crisci@awn.gr.ch (cuntanschibel a partir da las 09.00)
Responsabladad: Uffizi da guaud e privels da la natira