Dapi l'onn 2013 metta l'Uniun dals Grischs a disposiziun sin sia pagina d'internet www.udg.ch ils vocabularis per ils idioms puter e vallader. Cun sia lavur instancabla e facultativa sco redactur ha Gion Tscharner prestà ina contribuziun considerabla per cuntanscher quest term impurtant. En la vegliadetgna dad 88 onns dat el ussa vinavant questa incumbensa.

Gion Tscharner è stà in dals iniziants principals per ils vocabularis dals idioms puter e vallader ed ha tgirà quels sco redactur dal cumenzament ennà. Oriundamain consistiva la banca da datas da circa 83 000 endataziuns per il puter e da circa 96 000 endataziuns per il vallader. Suenter millis d'uras da lavur facultativa cumpiglia la banca da datas oz circa 99 000 endataziuns per il puter e circa 145 000 endataziuns per il vallader. Ultra da quai ha Gion Tscharner furnì supplementarmain ils ultims 6 onns las conjugaziuns da circa 3400 verbs dal puter e da circa 4000 verbs dal vallader, uschia che quellas han pudì vegnir integradas en ils vocabularis online.

Durant tut ses temp sco redactur ha Gion Tscharner plinavant respundì persunalmain millis d'e-mails da persunas, che n'avevan betg survegnì ina resposta adattada u cuntentaivla sin lur dumonda da tschertga.

Il Departament d'educaziun, cultura e protecziun da l'ambient ch'è responsabel per la promoziun da linguas engrazia a Gion Tscharner per ses engaschament instancabel ed extraordinari prestà «cun passiun» per la lingua rumantscha ed al giavischa tut il bun e cuntentientscha en sia bainmeritada pensiun.

Fotografia agiuntada:

Infurmaziuns:

cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 14.00 fin las 15.00), e-mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient