En il chantun Grischun han lieu dumengia, ils 15 da matg 2022, las elecziuns dal Cussegl grond e da la Regenza. La dumengia d'elecziun vegnan ils resultats actualisads mintga ura en l'internet sin www.gr.ch ed er communitgads sur Twitter e sur Facebook (#WahlenGR #ElecziunsGR #ElezioniGR).

A chaschun da las elecziuns dal Cussegl grond en 39 circuls electorals da dumengia, ils 15 da matg 2022, vegnan las votantas ed ils votants dal Grischun ad eleger da nov las commembras ed ils commembers dal Cussegl grond per ina perioda d'uffizi da 4 onns (cumenzament il 1. di da la sessiun d'avust 2022).
La repartiziun actuala dals 120 sezs en il Cussegl grond sin ils 39 circuls electorals – calculada tenor la populaziun permanenta – pudais Vus consultar qua.

A medem temp cun las elecziuns dal Cussegl grond han lieu dumengia, ils 15 da matg 2022, er las elecziuns da la Regenza per la perioda d'uffizi dal 1. da schaner 2023 fin ils 31 da december 2026. In eventual segund scrutini per las elecziuns da la Regenza è previs per dumengia, ils 12 da zercladur 2022.

Resultats intermediars mintga ura
La Chanzlia chantunala dal Grischun publitgescha dumengia, ils 15 da matg 2022, a partir da las 12.00, sin www.gr.ch/grw (Rumantsch > Elecziuns dal Cussegl grond) e sin www.gr.ch/rw (Rumantsch > Elecziuns da la Regenza) resultats intermediars tar las elecziuns.
Ils resultats intermediars vegnan actualisads mintga ura fin che las elecziuns èn a fin. Mintgamai in quart suenter l'ura vegnan mess a disposiziun novs resultats intermediars per las elecziuns dal Cussegl grond e mintgamai in quart avant l'ura novs resultats intermediars per las elecziuns da la Regenza.

Sin Twitter e sin Facebook annunzia il Servetsch da communicaziun ils resultats durant il di da las elecziuns cun hashtag #WahlenGR #ElecziunsGR #ElezioniGR.

Infurmaziuns:

Daniel Spadin, chancelier, Chanzlia chantunala, tel. +41 81 257 22 21, e‑mail Daniel.Spadin@staka.gr.ch (cuntanschibel tranter las 10.00 e las 12.00)

Responsabladad: Chanzlia chantunala