La Cumissiun dal Cussegl grond per giustia e segirezza (CGS) ha predeliberà la refurma da las dretgiras 3 per mauns dal Cussegl grond e propona d'approvar tala.
Sut la direcziun dal president da la cumissiun Gian Derungs ed en preschientscha dal cusseglier guvernativ Peter Peyer, schef dal Departament da giustia, segirezza e sanadad, ha la CGS predeliberà la missiva da la Regenza tar la refurma da las dretgiras 3. Il project cuntegna ina revisiun parziala da la Constituziun chantunala, la revisiun totala da la Lescha davart l'organisaziun giudiziala e – sco uschenumnadas midadas en auters relaschs – las revisiuns parzialas da 51 ulteriuras leschas. A chaschun da trais sesidas ha la cumissiun discutà detagliadamain la missiva e l'ha deliberada per mauns dal Cussegl grond.
Novaziuns incontestadas
Suenter ch'il Cussegl grond aveva gia concludì ils tratgs fundamentals da la refurma da las dretgiras 3 en la sessiun da zercladur 2019, èsi stà incontestà per la cumissiun d'entrar en il project. Incontestadas èn er stadas las novaziuns materialas essenzialas, tranter auter la fusiun da la Dretgira chantunala e da la Dretgira administrativa ad ina nova Dretgira superiura, la creaziun d'ina Dretgira da giustia e l'introducziun da plazzas da derschadras e derschaders a temp parzial. Vegnida beneventada è er l'installaziun d'in secretariat general per distgargiar las derschadras ed ils derschaders d'incumbensas administrativas.
La rotaziun dal presidi ha dà da discutar
Da maniera cuntraversa ha la cumissiun discutà davart la rotaziun dal presidi da la nova Dretgira superiura previsa. Las propostas respectivas en la cumissiun prevesan dus, quatter ed otg onns. Dal rest propona la cumissiun al Cussegl grond cunzunt midadas formalas e sustegna serradamain il project preschentà da la Regenza. Correspundentamain recumonda la cumissiun er unanimamain al Cussegl grond d'acceptar la refurma da las dretgiras 3 respectivamain da deliberar la revisiun parziala da la Constituziun chantunala per mauns da la votaziun dal pievel e d'approvar la revisiun totala da la Lescha davart l'organisaziun giudiziala.
Renovaziun d'in edifizi chantunal per realisar la refurma cun success
Ensemen cun la refurma da las dretgiras 3 vegn suttamessa al Cussegl grond er la missiva per la renovaziun dal vegl edifizi chantunal a la Grabenstrasse a Cuira. Qua tras duain vegnir stgaffidas las premissas da spazi per fusiunar la Dretgira chantunala e la Dretgira administrativa. Actualmain han las duas dretgiras lur sedias en dus differents lieus. Sch'il Cussegl grond approvescha questa renovaziun, vegn er quest project suttamess a la votaziun dal pievel, perquai ch'ils custs da renovaziun èn sur la limita per il referendum da finanzas obligatoric. Per che la refurma da las dretgiras 3 possia cuntanscher – areguard l'augment da l'effizienza e l'utilisaziun da sinergias – ses effect previs tras la fusiun da la Dretgira chantunala e da la Dretgira administrativa, èsi zunt impurtant ch'il Cussegl grond ed il pievel n'acceptian betg mo la refurma da las dretgiras 3, mabain er la renovaziun da l'edifizi chantunal.
Il Cussegl grond vegn a tractar la refurma da las dretgiras 3 en la sessiun da zercladur 2022.
Infurmaziuns:
President da la cumissiun Gian Derungs, tel. +41 79 641 30 72 (cuntanschibel fin las 12.00)
Responsabladad: Cussegl grond / Cumissiun per giustia e segirezza