Navigation

Inhaltsbereich

  • Erste Mitteilung
  • Neuen Beitrag einfügen

Il Departament d'economia publica e fatgs socials ha garantì al Club da hockey da Tavau SA ina prestaziun da sustegn da var 3,3 milliuns francs per custs betg cuvrids en connex cun l'annullaziun da la Cuppa Spengler Tavau 2021. Quai en il rom da las mesiras concernent las occurrenzas publicas d'impurtanza surchantunala en connex cun la pandemia da COVID-19.

Pervia da la situaziun epidemiologica precara da quella giada ha L'Uffizi da sanadad revocà ils 25 da december 2021 la permissiun da la polizia da sanadad per realisar la Cuppa Spengler 2021. Var 24 uras avant la realisaziun planisada ha la Cuppa Spengler 2021 pia stuì vegnir annullada. Questa annullaziun a fitg curta vista ha chaschunà gronds custs betg cuvrids al Club da hockey da Tavau SA.

En il fratemp ha il chantun examinà la dumonda dal Club da hockey da Tavau SA per ina participaziun als custs betg cuvrids. Ils custs betg cuvrids cumprovads importan var 3,7 milliuns francs. Suenter la deducziun d'ina franschisa e d'ina resalva persunala sa participeschan la Confederaziun ed il chantun cun ina prestaziun da sustegn da totalmain var 3,3 milliuns francs a quests custs.

Occurrenzas publicas en il Grischun
Tranter il settember 2021 e l'avrigl 2022 èn 48 occurrenzas publicas d'impurtanza surchantunala vegnidas messas en il Grischun sut la «protecziun finanziala per occurrenzas publicas». Cun excepziun da la Cuppa Spengler Tavau 2021 han legraivlamain tut las occurrenzas pudì avair lieu malgrà la pandemia da COVID-19.

Infurmaziuns:

Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 11 (cuntanschibel tranter las 13.00 e las 14.00), e-mail Marcus.Caduff@dvs.gr.ch


Responsabladad: Departament d'economia publica e fatgs socials

Neuer Artikel