La Regenza ha deliberà la missiva tar la revisiun parziala da la Lescha chantunala davart la protecziun da la natira e da la patria (LNPGR) En quella propona ella da stgaffir per las proprietarias ed ils proprietaris dals bains immobigliars pertutgads la pussaivladad da far protesta cunter l'inscripziun da lur objects en l'Inventari chantunal dals edifizis.

Il Cussegl grond ha decidì en la sessiun da zercladur 2019, ch'i sto vegnir concedì ina pussaivladad da far protesta a las proprietarias ed als proprietaris dals bains immobigliars pertutgads da l'inventarisaziun. Quest giavisch è vegnì integrà en la revisiun parziala qua avant maun da la Lescha chantunala davart la protecziun da la natira e da la patria. La LNPGR regla – en il rom dal mantegniment e da la tgira dal patrimoni istoric-cultural – er l'Inventari chantunal dals edifizis. En il sectur da la protecziun da la patria maina la Tgira da monuments dal Grischun quest inventari.

En l'avegnir duain las partidas da proprietaris da bains immobigliars pertutgadas pudair far protesta durant l'exposiziun publica. Quella sto vegnir inoltrada en scrit e cun motivaziun a l'Uffizi da cultura. Ils ulteriurs process concernent l'Inventari chantunal dals edifizis na vegnan betg midads. La revisiun parziala da la Lescha chantunala davart la protecziun da la natira e da la patria vegn suttamessa en la sessiun d'avust 2022 al conclus dal Cussegl grond.

Agiunta:

Missiva

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 10.00 fin las 11.00), e‑mail Jondomenic.Parolini@ekud.gr.ch

Responsabladad: Regenza