Perquai ch'ils dumbers da cas en Svizra s'augmentan, ha la Cumissiun federala per vaccinaziuns (CFV) adattà la recumandaziun da vaccinaziun. Da qua envi pon persunas dad 80 onns e dapli laschar rinfrestgar in'ulteriura giada la vaccinaziun (booster). La vaccinaziun vegn recumandada il pli baud 4 mais suenter l'ultima dosa da vaccinaziun ed il pli baud 4 emnas suenter ina infecziun passentada.

Persunas dad 80 onns e dapli han la ristga la pli gronda da daventar grevamain malsaunas da COVID-19. Las datas mussan plinavant che la protecziun cunter ina greva malsogna sa reducescha il pli svelt en questa gruppa da vegliadetgna. La vaccinaziun po augmentar almain a curta vista questa protecziun cunter ina greva malsogna e cunter in'ospitalisaziun.

Tras l'extensiun da la recumandaziun da vaccinaziun sin persunas dad 80 onns e dapli reageschan l'Uffizi federal da sanadad publica (UFSP) e la CFV sin la situaziun epidemiologica actuala. Access ad in'ulteriura vaccinaziun da rinfrestgament avevan fin ussa gia persunas da 12 onns e dapli cun ina greva defizienza dal sistem d'immunitad.

Ils custs da vaccinaziuns da rinfrestgament per viagiar ston vegnir pajads sez
Tgi che vul far in viadi e sto renovar ses certificat COVID, perquai che tal scada, po laschar rinfrestgar ina segunda giada sia vaccinaziun sin agens custs (ca. 60 francs). La vaccinaziun vegn dada «off-label», quai vul dir ordaifer ina recumandaziun da la CFV u dal UFSP.

L'obligaziun da surpigliar ils custs vala mo per la segunda vaccinaziun da rinfrestgament da persunas sut 80 onns. Gratuitas restan las vaccinaziuns per persunas tenor la recumandaziun da vaccinaziun da la CFV:

• l'emprima e la segunda vaccinaziun (immunisaziun da basa)
• l'emprima vaccinaziun da rinfrestgament
• vaccinaziuns per persunas cun in sistem d'immunitad fermamain supprimì (terza vaccinaziun per l'immunisaziun da basa e segunda vaccinaziun da rinfrestgament)
• ulteriuras vaccinaziuns da rinfrestgament per persunas dad 80 onns e dapli

Ina vaccinaziun da rinfrestgament vegn permessa a persunas da 12 onns e dapli, e quai il pli baud 4 mais suenter l'emprima vaccinaziun da rinfrestgament ed il pli baud 4 emnas suenter ina infecziun passentada.

S'annunziar per ina vaccinaziun cunter il coronavirus pon ins vinavant online sut www.gr.ch/vaccinar. Ina survista actuala dals posts da vaccinaziun en il chantun Grischun è disponibla sut www.gr.ch/impfzentren.

Uschia As protegis Vus vinavant
L'Uffizi da sanadad observa cuntinuadamain la situaziun epidemiologica. Actualmain na dovri naginas mesiras uffizialas per franar ils dumbers da cas. Vinavant vegni recumandà da sa laschar vaccinar, da restar a chasa en cas da sintoms, da purtar ina mascrina en cas da fullas da glieud, da dar aria a las stanzas pliras giadas a di, da tusser e da starnidar en in fazielet u en la foppa dal cumbel sco er da lavar bain ils mauns u da dischinfectar ils mauns.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch

Responsabladad: Uffizi da sanadad