Pervia dal grond privel d'incendis da guaud e da cultira ha l'Uffizi da guaud e privels da la natira pronunzià in scumond absolut da far fieu. Betg pertutgads dal scumond n'èn per entant l'Engiadina Bassa, l'Engiadin'Ota, la Val Müstair ed il Samignun.

En ils territoris pertutgads dal scumond èn scumandadas tut las activitads da fieu al liber. Exceptada da quai è la zona d'abitadi. La zona d'abitadi cumpiglia tut las zonas da construcziun cun vigur legala sco er las surfatschas ch'èn circumdadas cumplettamain da zonas da construcziun tenor las prescripziuns da las vischnancas. Las vischnancas han gia pronunzià u vegnan anc a pronunziar atgnas disposiziuns concernent in scumond da far fieu. Questas disposiziuns pon pertutgar er la zona d'abitadi e ston vegnir resguardadas spezialmain!

Per ils proxims dis vegn prognostitgada vinavant aura chauda da stad. Uschia s'augmenta er il privel d'incendis da guaud e da cultira vinavant en il Grischun. Dapi pliras emnas n'hai dà naginas plievgias intensivas pli. Ultra da quai han la bell'aura da stad ed ils dis da bler vent setgentà fermamain ils terrens dals guauds e la bostgaglia. Sut questas cundiziuns pon fieus daventar facilmain nuncontrollabels e sa derasar fitg svelt. Ina mitigiaziun da la setgira acuta n'è betg en vista. Urizis isolads na bastan betg per meglierar la situaziun, er betg sch'els èn per in curt mument fitg vehements.

Ulteriuras infurmaziuns e la valitaziun da la situaziun actuala stattan a disposiziun sin la pagina d'internet da l'Uffizi da guaud e privels da la natira.

Infurmaziuns:

Andrea Kaltenbrunner, Surveglianza dal guaud, Uffizi da guaud e privels da la natira, tel. +41 81 257 38 68 (cuntanschibel a partir da las 09.00), e‑mail Andrea.Kaltenbrunner@awn.gr.ch

Responsabladad: Uffizi da guaud e privels da la natira