Il president da la Confederaziun Ignazio Cassis ha avert ier a Puntraschigna la Conferenza svizra da las ambassaduras e dals ambassadurs da quest onn. En il center da l'occurrenza stattan la guerra en l'Europa sco er las consequenzas per il multilateralissem e per la neutralitad.

Ina giada l'onn vegnan las ambassaduras ed ils ambassadurs, las consulas ed ils consuls generals, las manadras ed ils manaders da la Collavuraziun internaziunala (CI), sco er il cader superiur dal Departament federal d'affars exteriurs (DFAE) envidads a la Conferenza da las ambassaduras e dals ambassadurs. Durant la scuntrada discutan las participantas ed ils participants davart temas actuals da la politica exteriura. A chaschun da differentas occurrenzas durant la conferenza vegnan ultra da quai plirs commembers dal Cussegl federal, il chancelier federal sco er il topcader da l'administraziun federala a referir davart temas da lur secturs da lavur che cumpiglian aspects da la politica exteriura. En il focus da la conferenza da quest onn stattan tematicas enturn la guerra actuala en l'Europa. En quest connex vegni discutà tranter auter davart las consequenzas per la politica exteriura da la Svizra, ils interess ed ils spazis d'agir da la Svizra concernent la democrazia ed ils dretgs umans sco er las midadas en connex cun la segirezza europeica. La conferenza dura dals 22 fin ils 24 d'avust 2022 e vegn manada tras a Puntraschigna ed a Berna. 

Di chantunal sut l'ensaina da la cultura e lingua rumantscha
En il rom da la Conferenza da las ambassaduras e dals ambassadurs èsi usità, ch'il chantun ospitant organisescha e realisescha mintgamai in uschenumnà «Di chantunal». Il Di chantunal da quest onn ha lieu oz. La Regenza grischuna è preschenta in corpore al Di chantunal. Il president da la Regenza grischuna Marcus Caduff ha avert il Di chantunal oz avantmezdi ed accumpogna ils differents puncts da program ensemen cun ils commembers da la Regenza. En differentas gruppas han las participantas ed ils participants da la conferenza visità l'avantmezdi il Corvatsch, il Piz Nair, la Diavolezza sco er Muottas Muragl. Il suentermezdi stattan sin il program differentas activitads sportivas, culturalas e culinaricas en la regiun da Puntraschigna.

Il Di chantunal sa concentrescha sin dus temas centrals. D'ina vart duain las participantas ed ils participants emprender d'enconuscher meglier la lingua e cultura rumantscha e vegnir sensibilisads per las caracteristicas da la quarta lingua naziunala. Da l'autra vart duain il chantun Grischun e la regiun Engiadin'Ota vegnir preschentads sco destinaziuns da vacanzas attractivas. Cun differentas activitads vegn purschida a las participantas ed als participants in'aventura incumparabla ed autentica en la natira, en la cuntrada, en la cultura ed en il mund da lavur da l'Engiadin'Ota.

Fotografias agiuntadas:

Da sanestra: il president da la Regenza Marcus Caduff, il president da la Confederaziun Ignazio Cassis e la presidenta communala da Puntraschigna Nora Saratz.

Foto 2, Foto 3

Infurmaziuns:

President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch

 

Responsabladad: Regenza