En passa 30 lieus en Svizra sco er en il Principadi da Liechtenstein vegnan organisadas rundas da discussiun dal program licenzià «Femmes-Tische/Männer-Tische». Per il cumenzament da l'onn 2022 ha il Post spezialisà per l'integraziun surpiglià da manar las discussiuns en ils lieus dal chantun Grischun.

Quai che ha cumenzà avant 26 onns cun ina idea visiunara en il chantun Soloturn – numnadamain da purtar la furmaziun da geniturs cun rundas da discussiun animadas en las stivas da la Svizra – è daventà ina istorgia da success unica. L'onn 2021 han uschia discutà cuminaivlamain en l'entira Svizra pli che 12 000 persunas da las pli differentas linguas e culturas en pitschnas gruppas sut l'instrucziun da moderaturas e moderaturs scolads dumondas pertutgant il mintgadi, la sanadad, la famiglia e l'integraziun. Plinavant èn ellas sa barattadas davart experientschas ed enconuschientschas ed han survegnì infurmaziuns davart purschidas e davart posts da cussegliaziun.

Cun la purschida da furmaziun informala vegnan cuntanschidas persunas che na chattan strusch in access a las purschidas formalas e che vivan savens en ina isolaziun sociala. Latiers tutgan en spezial er persunas cun ina biografia da migraziun. Da pudair discutar en l'atgna lingua davart dumondas e davart experientschas ha per bleras d'ellas in effect positiv per dumagnar il mintgadi. In studi d'efficacitad actual da la Scola auta spezialisada bernaisa per lavur sociala mussa, che las participantas ed ils participants sa sentan promovids en lur participaziun sociala grazia a l'extensiun da lur libertads d'agir. Plinavant profitian ellas ed els sco er lur famiglias e lur ambient pli stretg da las enconuschientschas fatgas.

Discurs ed intermediaziun da savida sin nivel da partenari
Il team da moderaziun grischun cumpiglia actualmain otg dunnas e quatter umens cun atgna experientscha da migraziun ch'èn da chasa en las regiuns Landquart, Partenz/Tavau, Plaun u Plessur. Tranter auter han ellas ed els grondas cumpetenzas da communicaziun sco er ina buna rait sociala. E grazia a scolaziuns praticas èn ellas ed els preparads optimalmain per lur incumbensa pretensiusa.

Suenter la partenza dal program questa primavaira han gia gì lieu passa 30 rundas da discussiun. Ils resuns da las moderaturas e dals moderaturs sustegnan Margot Heuberger, manadra dals lieus da Femmes-Tische/Männer-Tische en il Grischun, en sia persvasiun, che l'introducziun dal program da prevenziun e da promoziun da la sanadad en il Grischun saja impurtanta: «Nossas moderaturas e noss moderaturs uneschan – sur lur raits privatas – persunas per discutar ensemen davart tematicas concretas dal mintgadi. En il center stattan quellas dumondas, che occupan las participantas ed ils participants il pli fitg. Sin quellas dumondas vegnan tschertgadas e chattadas cuminaivlamain respostas. Mintga enconuschientscha ch'ins fa uschia, rinforza l'integraziun sociala. Dumondas datti bleras – nossas moderaturas e noss moderaturs restan al current.»

Ulteriuras infurmaziuns davart il program pon ins consultar sut www.integration.gr.ch (noziun tschertgada Femmes-Tische/Männer-Tische) e sut www.femmestische.ch.

Fotografias agiuntadas:

Infurmaziuns:

Felix Birchler, manader dal Post spezialisà per l'integraziun/Incumbensà chantunal d'integraziun, tel. +41 81 257 36 84, e‑mail Felix.Birchler@afm.gr.ch

Responsabladad: Post spezialisà per l'integraziun