Dapi l'onn 2017 metta il chantun Grischun a disposiziun novs meds d'instrucziun da lingua en ils idioms puter, sursilvan, sutsilvan e vallader. La retscha da meds d'instrucziun cumpara sut il num «Mediomatix» ed è coordinada cun il Plan d'instrucziun 21. Punctualmain per il cumenzament da l'onn da scola 2022/23 cumplettescha ussa in'ulteriura publicaziun en surmiran, inclusiv grammatica da scola, la retscha da meds d'instrucziun per la 2. classa dal stgalim primar. Ils documents per las ulteriuras classas vegnan actualmain elavurads.
Ils meds d'instrucziun da lingua per la scola populara obligatorica en puter, surmiran, sursilvan, sutsilvan e vallader èn vegnids respectivamain vegnan elavurads da la Scola auta da pedagogia dal Grischun per incumbensa dal chantun Grischun en il rom dal project «Mediomatix».
Analog e digital
Sco gia tar ils toms ch'èn vegnids edids en ils auters quatter idioms, èn er quests cuntegns vegnids elavurads cun agid d'in uschenumnà CMS (content management system). Ils cudeschs da lavur stattan a disposiziun tant en furma stampada sco er en furma digitala sco e-books. Per classa consistan els da quatter cudeschs da lavur cun mintgamai dus fin trais chapitels. Directamain integradas en las versiuns digitalas èn plinavant las medias necessarias per l'instrucziun, sco chanzuns, texts auditivs e sequenzas da films. Ils commentaris correspundents per las persunas d'instrucziun èn disponibels en furma digitala sco PDFs. Els na cuntegnan betg mo explicaziuns detagliadas per la concepziun da l'instrucziun, mabain er ideas, descripziuns da projects, soluziuns, models da copiar, lezias e pensums supplementars sco er controllas d'emprender. Il med d'instrucziun porscha uschia pussaivladads d'applicaziun multifaras a las persunas d'instrucziun.
Il mund da las scolaras e dals scolars vegn resguardà
Ils meds d'instrucziun resguardan las prescripziuns dal Plan d'instrucziun 21 Grischun. Las lezias ed ils pensums ch'els cuntegnan han differents grads da cumplexitad ed èn orientads a las cumpetenzas. In'attenziun speziala è vegnida dada a la diversitad metodica sco er a la determinaziun da finamiras da l'instrucziun confurmas al stgalim. Ils meds d'instrucziun tematiseschan dumondas actualas dal mund da las scolaras e dals scolars e resguardan las atgnadads regiunalas e culturalas. Ins vesa ch'ils cuntegns vegnan sviluppads vinavant permanentamain ed approfundads confurm al stadi d'emprender (princip da spirala). Quai sa mussa adina er en las lezias ed ils pensums ch'èn differenziads. Ils cuntegns vegnan preschentads confurm al stgalim ed en moda attractiva. Las basas grammaticalas ed ortograficas èn da chattar en la grammatica da scola ch'è vegnida sviluppada supplementarmain.
Meds d'instrucziun da lingua obligatorics
Ils meds d'instrucziun dal project «Mediomatix» èn vegnids declerads da la Regenza sco meds d'instrucziun da lingua obligatorics per las scolas rumantschas e bilinguas dal chantun Grischun. Els pon vegnir retratgs tar ils Meds d'instrucziun dal Grischun (lmv.gr.ch).
Ulteriurs meds d'instrucziun en surmiran per la 3. classa dal stgalim primar fin la 3. classa dal stgalim secundar I vegnan actualmain elavurads. Els duain cumparair dad onn da scola ad onn da scola, e quai in suenter l'auter fin l'onn 2029. Ulteriuras infurmaziuns davart il project da meds d'instrucziun stattan a disposiziun sin la pagina d'internet www.mediomatix.ch.
Fotografia agiuntada:
Infurmaziuns:
- Dr. Chantal Marti-Müller, manadra da l'Uffizi per la scola populara ed il sport, e-mail Chantal.Marti@avs.gr.ch
- Rico Cathomas, manader dal project «Mediomatix», Scola auta da pedagogia dal Grischun, tel. +41 81 354 03 09 (cuntanschibel da las 11.00 fin las 13.00), e-mail Rico.Cathomas@phgr.ch
Responsabladad: Uffizi per la scola populara ed il sport