Ils 15 da settember 2022, il Di internaziunal da la democrazia, ha lieu il di da furmaziun davart il tema participaziun dals uffants e dals giuvenils en la sala dal Cussegl grond a Cuira. Il Di da la democrazia vegnan dilucidads ils dretgs da cundecider sco er las furmas da participaziun dals uffants e dals giuvenils. Il di da furmaziun davart la participaziun dals uffants e dals giuvenils fa part dal program Politica d'uffants e da giuvenils en il chantun Grischun.
Cun participaziun è manegiada la contribuziun activa d'ina persuna u d'ina gruppa a process da decisiun u ad andaments d'acziuns che han lieu en structuras u en organisaziuns surordinadas. Atgnas activitads rinforzan la prontezza da surpigliar responsabladad envers sasez, envers interess che pertutgan l'agen mund da viver sco er envers la communitad.
Il di da furmaziun sa drizza a persunas che lavuran en lur ambient professiunal u sin basa voluntara cun uffants e cun giuvenils. Commembras e commembers d'autoritads da vischnancas, da cumissiuns e da baselgias che vulan stgaffir, fundar u pussibilitar formats da participaziun, èn medemamain bainvegnids.
Participaziun sco pitga d'ina politica d'uffants e da giuvenils cun success en il Grischun
Il program Politica d'uffants e da giuvenils en il chantun Grischun sa basa sin las trais pitgas protecziun, promoziun e participaziun. Ina participaziun cun success stgaffescha confidenza en sasez e promova in svilup saun dals uffants e dals giuvenils. La finamira surordinada da la politica d'uffants e da giuvenils è quella da concepir las cundiziuns da viver dals uffants e dals giuvenils uschia, ch'els pon exprimer e sviluppar optimalmain lur persunalitad.
Pussaivladads da realisaziun e projects concrets en lavuratoris ed en referats
En il pled da bainvegni dal president da la Regenza, Marcus Caduff, survegnan las participantas ed ils participants ina invista dals pass ch'èn vegnids realisads sin basa dal model directiv elavurà e da las mesiras dal program. Il referat dad Alissa Brenn e da Mona Meienberg da la UNICEF Svizra e Liechtenstein preschenta il dretg da participaziun tenor l'artitgel 12 da la Convenziun da l'ONU davart ils dretgs da l'uffant. Las participantas ed ils participants emprendan d'enconuscher realisaziuns concretas ed exempels da la buna pratica en ils lavuratoris davart il Cussegl da giuventetgna da l'uvestgieu da Cuira, davart il «Parlament da mattas», davart il nov sistem electoral, davart il project da participaziun, davart la Cumissiun da giuventetgna da Stussavgia, davart ils Vitgs alpins attractivs per giuvenils e davart la Sessiun dals giuvenils Grischun.
Di internaziunal da la democrazia
L'onn 2007 ha la ONU elegì ils 15 da settember sco Di internaziunal da la democrazia. Il di da furmaziun è ina da pliras occurrenzas en l'entira Svizra che han lieu quel di.
Agiuntas:
Infurmaziuns:
Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 14.00 fin las 15.30), e-mail Susanna.Gadient@soa.gr.ch
Responsabladad: Uffizi dal servetsch social