Cun la revisiun da la Lescha davart la promoziun da la tgira d'uffants cumplementara a la famiglia en il chantun Grischun (LTGU) vul la Regenza rinforzar la cumpatibilitad da la famiglia cun l'activitad da gudogn sco er promover il svilup dals uffants. Per quest intent duai la finanziaziun da la tgira d'uffants cumplementara a la famiglia vegnir reglada da nov. Ultra da quai duai vegnir realisada ina midada da sistem, davent da la finanziaziun da l'object a la promoziun orientada al subject.
La tgira d'uffants cumplementara a la famiglia è in instrument central per pudair garantir la cumpatibilitad da la famiglia cun la professiun. Plinavant gida ella a promover il svilup dals uffants sco er a sustegnair l'integraziun sociala. Ultra da quai fa ella frunt a la mancanza da persunas spezialisadas. Cun la revisiun stgaffescha il chantun Grischun in instrument per diriger en moda efficazia sias finamiras da promoziun. Da nov sustegnan il chantun e las vischnancas las famiglias sin fundament da lur capacitad economica – e betg pli cun pajar contribuziuns da basa als furniturs da purschidas da la tgira d'uffants cumplementara a la famiglia.
Garantir il tractament egual entaifer il chantun
Il nov model garantescha, ch'il maun public tractia tut las famiglias en moda eguala en tut il chantun. Ultra da quai creescha quest model las medemas premissas da partenza per tut ils furniturs da prestaziuns da la tgira d'uffants cumplementara a la famiglia en il Grischun. «Ina purschida bain sviluppada e d'auta qualitad da la tgira d'uffants cumplementara a la famiglia a pretschs raschunaivels è ina pitga impurtanta per la cumpatibilitad da la professiun cun la famiglia e cumbatta uschia la mancanza da persunas spezialisadas», argumentescha il president da la Regenza Marcus Caduff. Las tariffas na dependan betg pli da las entradas da las famiglias. Las ristgas per las purschidas da la tgira d'uffants en territoris cun structuras deblas u cun ina gronda cumpart da geniturs cun entradas bassas vegnan uschia minimadas e la planisabladad vegn meglierada.
La promoziun tempriva è fitg impurtanta
Ina promoziun tempriva ha effects impurtants per l'economia publica. Ils uffants, dals quals las cumpetenzas fundamentalas linguisticas, coordinativas e cognitivas èn bain sviluppadas, han meglras premissas per absolver ina scolaziun qualifitgada e per uschia cuntanscher ina independenza economica stabila a lunga vista. Da nov survegn il chantun la pussaivladad da conceder meds da promoziun supplementars per tgirar uffants cun impediments cumplementarmain a la famiglia. Uschia pon tut ils uffants vegnir promovids meglier tenor lur basegns e sustegnids en lur svilup pli confurm a la gruppa en mira.
Custs per las prestaziuns a las famiglias en il Grischun
La realisaziun da la revisiun da questa lescha chaschuna dapli custs per il chantun e per las vischnancas. A medem temp sa reduceschan ils custs proporziunals per las famiglias. Il chantun e las vischnancas pajan mintgamai la mesadad da las contribuziuns publicas. Il svilup futur dals custs è dinamic. El dependa dal basegn da tgira e da la structura da la capacitad economica da las famiglias che tiran a niz purschidas da la tgira ordaifer la famiglia. I vegn spetgà ch'ils custs cunvegnan a lunga vista, quai grazia als effects positivs per l'economia publica.
Agiuntas:
missiva
LTGU - Curt e bain
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibla da las 13.00 fin las 14.00), e‑mail Marcus.Caduff@dvs.gr.ch
Responsabladad: Regenza