Navigation

Inhaltsbereich

  • Erste Mitteilung
  • Neuen Beitrag einfügen

Dapi l'onn 2010 è la bova a Brinzauls s'accelerada fermamain e dapi plirs onns vegn ella perscrutada intensivamain. Emprimas enconuschientschas d'ina gallaria da sondagi sut la bova han mussà, ch'ins po effectivamain ralentar la bova, sch'ins reducescha las pressiuns da l'aua. La Regenza propona ussa al Cussegl grond da conceder in credit d'impegn da 40 milliuns francs per realisar ina gallaria da drenascha definitiva. La gallaria duai gidar en emprima lingia ad impedir donns, dischavantatgs e custs anc pli gronds che resultassan per la populaziun dal vitg e per il maun public.

Durant ils ultims stgars 15 onns è la bova a Brinzauls s'accelerada extraordinariamain fitg. Actualmain vegnan mesiradas ratas da moviment da var 135 centimeters per onn en il vitg. Correspundentamain datti adina dapli donns vi dals edifizis e vi da l'infrastructura. Pervia da questas ratas da moviment extraordinarias vegn la bova perscrutada intensivamain dapi plirs onns. La finamira da questas retschertgas fitg cumplessivas è d'elavurar las basas per realisar ina gallaria da drenascha.

La drenascha duai reducir las pressiuns da l'aua
En il decurs da las retschertgas èsi sa mussà pli e pli fitg che pressiuns pli autas da l'aua èn il motiv per quests moviments massivs. Sin l'entir mund èn pressiuns pli autas da l'aua en il sutterren vegnidas identifitgadas sco motiv per ils moviments, e quai tar differentas bovas d'ina grondezza e d'ina disposiziun sumeglianta. Tras ina reducziun da questas pressiuns da l'aua èn ils moviments adina sa diminuids en quests lieus.

Las retschertgas actualas cumpiglian er la construcziun d'ina gallaria da sondagi che duai servir per perscrutar l'effect d'ina eventuala drenascha ed uschia er l'influenza sin las pressiuns da l'aua. Emprimas enconuschientschas en la gallaria da sondagi sut la part vest da la bova a Brinzauls han mussà, che las pressiuns da l'aua pon effectivamain vegnir reducidas, uschia che la bova sa mova pli plaun. Las retschertgas en la gallaria da sondagi n'èn anc betg terminadas. Igl è dentant gia sa confermà ch'ina gallaria da drenascha porscha las schanzas per sanar duraivlamain la bova a Brinzauls. Uschia duain vegnir impedids ulteriurs donns pli gronds vi da l'infrastructura ed ina dischlocaziun eventualmain necessaria da las abitantas e dals abitants da Brinzauls.

Cun il credit d'impegn proponì da 40 milliuns francs vegnan cuvrids ils custs per la varianta che stat actualmain en il center. Questa varianta prevesa ina gallaria da drenascha en il grip stabil. Il Cussegl grond vegn a tractar la proposta da conceder in credit d'impegn previsiblamain durant la sessiun da december.

Fotografia agiuntada:

Foto Sondierstollen Brienz

Gallaria da sondagi sut la bova a Brinzauls durant las lavurs da construcziun

Agiunta:

missiva

Infurmaziuns:

  • Cusseglier guvernativ Dr. Mario Cavigelli, schef dal Departament d'infrastructura, energia e mobilitad dal Grischun, tel. +41 81 257 36 01 (cuntanschibel fin las 10.30), e-mail Mario.Cavigelli@diem.gr.ch
  • Urban Maissen, selvicultur chantunal, Uffizi da guaud e privels da la natira, tel. +41 81 257 38 51, e-mail Urban.Maissen@awn.gr.ch


Responsabladad: Regenza

Neuer Artikel