En vista a la stgarsezza d'energia smanatschanta presta il chantun sia contribuziun per spargnar energia. Il plan da mesiras che la Regenza ha concludì per optimar il manaschi da l'administraziun chantunala, duai gidar a mitigiar las consequenzas d'ina eventuala stgarsezza d'energia.
La coincidenza da differents eveniments (guerra en l'Ucraina, interrupziuns d'ovras atomaras, sitgira e.u.v.) ha augmentà la probabilitad d'ina stgarsezza d'energia er en Svizra. Stretgas pli lungas tar la furniziun pudessan engrevgiar supplementarmain la situaziun e l'energia stuess vegnir contingentada. In tal scenari sto absolutamain vegnir evità. Numerusas interpresas e branschas han pervia da quai, ma er sin basa da l'augment dals pretschs d'energia, analisà lur potenzial da spargnar energia ed instradà mesiras per reducir il consum d'energia. Cun la campagna actuala «L'energia è stgarsa. Na la sfarlattain betg.» sensibilisescha la Confederaziun la populaziun e las interpresas per la problematica. La campagna intermediescha mesiras da spargnar energia concretas ch'ins po realisar facilmain. Questas mesiras servan en general a mitigiar la situaziun e gidan las utilisadras ed ils utilisaders a spargnar custs.
Clera reducziun dal consum d'energia tar l'administraziun chantunala
L'administraziun chantunala sco pli gronda patruna dal chantun surpiglia a partir d'immediat sia funcziun d'exempel en connex cun las mesiras pretendidas per spargnar energia. Per quest intent ha la Regenza deliberà in plan da mesiras a trais stgalims. Per tut ils edifizis dal chantun ha ella uschia en mira da reducir l'entir consum d'energia per almain 15 pertschient. Il medem mument duain resultar ulteriurs respargns substanzials cun far diever dals meds da lavur e da mobilitad en moda anc pli effizienta areguard l'energia.
«Reducir – minimar – optimar»
Per pudair exaurir effizientamain il potenzial da spargnar, vegnan las mesiras realisadas en moda graduada a trais stgalims. Cun sbassar la temperatura dals locals a maximalmain 20 grads Celsius, cun reducir l'illuminaziun u cun limitar il diever dals ascensurs vegn – en l'emprima fasa – cuntanschida ina clera reducziun dal consum d'energia. Il catalog da mesiras da l'emprima fasa prevesa plinavant da limitar ils viadis da servetsch e da remplazzar tant sco pussaivel las sesidas fisicas tras sesidas online. Medemamain vegnan las collavuraturas ed ils collavuraturs animads da midar pli savens al traffic public u al velo. En l'emprima fasa duai la finala il consum d'energia da l'administraziun vegnir sbassà, tras quai che las persunas emploiadas pon lavurar pli savens davent da chasa. Quai reducescha supplementarmain viadis da pendularis.
Las mesiras da la segunda fasa minimeschan il consum d'energia cun garantir l'adempliment cumplet da las incumbensas administrativas. Tranter auter vegnan uschia limitadas las uras da manaschi e d'avertura da las localitads da biro, e la glisch sco er la ventilaziun vegnan serradas giu cumplainamain ordaifer las uras da manaschi. La temperatura da quels locals, che vegnan duvrads mo sporadicamain, vegn sbassada a sut 18 grads Celsius.
En la terza fasa duai il consum d'energia vegnir optimà supplementarmain cun agid da mesiras organisatoricas rigurusas. En quest connex èsi previs da metter ord funcziun singuls manaschis, stabiliments ed edifizis e d'als transferir en in mantegniment d'alloschis vids sco er da reunir ils plazs da lavur en in lieu adattà e d'anc ina giada densifitgar els localmain. En la terza fasa vegni ultra da quai considerà d'introducir in'obligaziun pli severa da lavurar parzialmain u per part cumplettamain davent da chasa.
L'Uffizi chantunal da construcziun auta è vegnì incumbensà da la Regenza da realisar immediatamain en furma graduada l'emprima e la segunda fasa. Pertutgant la terza fasa duai l'Uffizi da construcziun auta elavurar en in emprim pass in concept detaglià e preschentar quel a la Regenza per laschar prender in conclus separà.
Igl è indispensabel che las mesiras per spargnar energia vegnan applitgadas vastamain da la populaziun
Las mesiras che la Regenza ha concludì duain gidar a mitigiar las consequenzas d'ina eventuala stgarsezza d'energia per la populaziun e particularmain er per l'economia e per il turissem. Plinavant èsi indispensabel ch'er la vasta populaziun e las interpresas sustegnan solidaricamain las mesiras per spargnar energia che vegnan recumandadas da la Confederaziun e dals chantuns.
Dapli infurmaziuns:
Infurmaziuns:
Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel a partir da las 12.00), e-mail Mario.Cavigelli@diem.gr.ch
Responsabladad: Regenza
Mesiras da l'administraziun chantunala tenor fasas