L'atun 2022 stoi danovamain vegnir fatg quint cun in augment da las infecziuns e dals dumbers da cas. Apotecas, praticas per medischina generala e centers da vaccinaziun extendan perquai lur purschidas l'october 2022 e porschan numerusas vaccinaziuns gratuitas cunter il coronavirus senza preannunzia.
A tut las persunas spezialmain periclitadas vegni recumandà fermamain da laschar rinfrestgar la vaccinaziun l'atun 2022. Tut las autras persunas a partir da 16 onns pon medemamain laschar rinfrestgar la vaccinaziun, en spezial er persunas spezialisadas dal sectur da sanadad ed assistentas sco er assistents da persunas spezialmain periclitadas. La vaccinaziun da rinfrestgament porscha per in curt temp ina tscherta protecziun cunter ina infecziun e cunter la malsogna. Fin ad in tschert grad po la vaccinaziun da rinfrestgament perquai er reducir absenzas a la plazza da lavur. Ultra da quai restrenscha ella il privel da patir da «Long COVID».
Recumandada vegn la vaccinaziun da rinfrestgament cun vaccins mRNA (Pfizer/BioNTech / Moderna) u il Nuvaxovid che sa basa sin proteins (Novavax). Per las vaccinaziuns da rinfrestgament duain vegnir injectads da preferenza ils vaccins mRNA bivalents ch'èn adattads a la varianta Omicron BA.1. Laschar rinfrestgar la vaccinaziun duess ins il pli baud 4 mais suenter l'ultima vaccinaziun u suenter la guariziun.
Vaccinaziuns da rinfrestgament senza preannunzia (walk-in) datti a partir d'immediat
En coordinaziun cun la campagna naziunala da vaccinaziun da l'october 2022 vegnan apotecas, praticas per medischina generala e centers da vaccinaziun en tut las regiuns dal chantun ad extender lur capacitads e porscher vaccinaziuns da rinfrestgament senza preannunzia. A Cuira mainan plinavant la citad da Cuira, l'Ospital chantunal dal Grischun e l'Uffizi chantunal da sanadad in center da booster temporar. Quest center da booster sa chatta sper la Halla da la citad da Cuira e porscha cussegliaziuns da vaccinaziun, emprimas vaccinaziuns sco er vaccinaziuns da rinfrestgament senza preannunzia. La purschida stat a disposiziun dals 11 d'october 2022 fin ils 5 da november 2022, mintgamai mardi fin sonda, da las 10.00 fin las 18.00.
Ina survista actuala dals posts da vaccinaziun (apotecas, praticas per medischina generala e centers da vaccinaziun) en il chantun Grischun è publitgada sut www.gr.ch/impfzentren.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch
Responsabladad: Uffizi da sanadad