L'Uffizi da sanadad dal Grischun quinta cun in augment dals dumbers da cas da COVID-19 durant l'atun e l'enviern. Per il cas che las instituziuns da sanadad vegnissan surchargiadas cun pazientas e pazients cun grevs decurs da COVID-19, ha l'Uffizi da sanadad elavurà ina planisaziun preventiva, quai en enclegientscha cun ils ulteriurs departaments involvids. Eventualas mesiras necessarias vegnan prendidas en enclegientscha ed en coordinaziun cun la Confederaziun e cun ils auters chantuns. La Regenza ha prendì enconuschientscha da la planisaziun preventiva da l'Uffizi da sanadad cunter COVID-19 per l'atun/enviern 2022/23.
En cumparegliaziun cun ils dus ultims envierns da pandemia è la situaziun da COVID-19 sa midada cleramain tenor l'Uffizi da sanadad: En Svizra han actualmain passa 97 pertschient da la populaziun anticorpuls cunter SARS-CoV-2, perquai ch'els èn vaccinads u guarids da COVID-19. Las persunas senza facturs da ristga han ina pitschna ristga da daventar grevamain malsaunas quest atun. La probabilitad ch'il sectur da sanadad vegnia surchargià è perquai pli pitschna che durant ils dus ultims envierns.
Surpigliar responsabladad per proteger las persunas spezialmain periclitadas
Suenter dus onns da pandemia possia mintgina e mintgin surpigliar responsabladad e gidar ad evitar la derasaziun dal virus ed en spezial a proteger persunas fragilas, di la media chantunala Marina Jamnicki. «Tegnair distanza, lavar bain u dischinfectar ils mauns, purtar ina mascrina e dar regularmain aria èn anc adina meds cumprovads per franar il virus.» En cas da sintoms da malsogna èsi er impurtant da restrenscher ils contacts u da purtar ina mascrina.
Sch'il dumber da cas gravants avess da s'augmentar fermamain l'enviern 2022/23 en il Grischun e sch'ins stuess perquai temair ch'il sectur da sanadad vegnia surchargià pervia da COVID-19, po la Regenza danovamain prender mesiras, quai en enclegientscha cun la Confederaziun e cun ils auters chantuns. Sco fin ussa ha er la planisaziun preventiva l'intent d'impedir che las instituziuns da sanadad vegnian surchargiadas pervia da COVID-19. Plinavant vul ella minimar uschè bain sco pussaivel las consequenzas per il mintgadi e per l'economia.
La planisaziun preventiva da l'Uffizi da sanadad per l'atun/enviern 2022/23 sa basa sin las experientschas e sin las statisticas d'enfin ussa sco er sin las evaluaziuns e sin ils rapports da la Confederaziun e dal chantun. Er sch'i na vegnan fatgs nagins tests da massa pli, po l'Uffizi da sanadad far in maletg dal decurs da la pandemia a maun dals suandantas indicaturs: ils dumbers da cas che vegnan eruids er vinavant, l'occupaziun dal sistem da sanadad, la cumpart procentuala da grevs decurs da COVID-19 pertutgant la varianta circulanta, il dumber da letgs occupads en ils ospitals generals e sin las staziuns intensivas sco er il monitoring da l'aua persa.
Recumandaziuns per proteger las persunas spezialmain periclitadas
L'Uffizi da sanadad analisescha cuntinuadamain la situaziun epidemiologica. Actualmain na dovri naginas mesiras uffizialas per franar la derasaziun dal virus. Tgi che vul sa proteger, po observar ils suandants princips fundamentals: sa laschar vaccinar, purtar ina mascrina, avrir pliras giadas il di las fanestras per dar aria, lavar bain u dischinfectar ils mauns, tusser e starnidar en in fazielet u en la foppa dal cumbel, evitar da dar il maun.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch
Responsabladad: Uffizi da sanadad