En il rom da la sessiun d'enviern da las Chombras federalas èsi previs, ch'il cusseglier naziunal Martin Candinas vegn elegì sco president dal Cussegl naziunal per la perioda d'uffizi 2022/2023. Mesemna, ils 30 da november 2022, ha previsiblamain lieu la festa uffiziala a Mustér. A partir da las 14.00 è la populaziun cordialmain envidada da participar a las festivitads uffizialas.

Per cumenzar la sessiun d'enviern da las Chombras federalas stat glindesdi, ils 28 da november 2022, l'elecziun da Martin Candinas sco president dal Cussegl naziunal sin la glista da tractandas dal Cussegl naziunal. Sch'el vegn elegì, ha lieu mesemna, ils 30 da november 2022, la festa uffiziala en onur dal «pli aut Svizzer» en la vischnanca da Mustér ed en la citad da Cuira.

Festivitads uffizialas ensemen cun la populaziun
Il novelegì president dal Cussegl naziunal viagia en cumpagnia da la cussegliera federala Viola Amherd sco er d'ulteriurs giasts davent da Berna en sia patria, la Surselva. Il suentermezdi baud arriva il tren spezial a la staziun da Mustér. Il til festiv cumenza a las 14.00 a la staziun da Mustér e va fin la baselgia claustrala da Mustér. Accumpagnads vegnan ils giasts envidads da las societads da musica indigenas da la regiun. La populaziun è envidada d'ornar en moda festiva lur fatschadas da chasa per lung da la via principala cun bandieras. L'act festiv uffizial cumenza a las 14.45 en la baselgia claustrala da Mustér, nua che la cussegliera federala Viola Amherd, il president da la Regenza Marcus Caduff sco er il novelegì president dal Cussegl naziunal vegnan a tegnair lur pleds. Per l'accumpagnament musical da l'act festiv procuran l'artist indigen Mario Pacchioli sco er la sopranista indigena Bettina Marugg Herrmann cun il chor dal gimnasi da Mustér. Suenter la part uffiziala ha lieu in aperitiv. La populaziun è envidada cordialmain da participar a las festivitads en la baselgia claustrala ed a l'aperitiv suandant.

Suenter l'act festiv uffizial planisà en la baselgia claustrala da Mustér vegnan ils giasts envidads a viagiar vinavant cun in tren spezial en direcziun da Cuira ed a sa render per l'occurrenza da saira en la Halla da la citad da Cuira.

Infurmaziuns:

President da la Regenza Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel fin las 10.30), e‑mail Marcus.Caduff@dvs.gr.ch

Responsabladad: Regenza