Il cusseglier guvernativ Christian Rathgeb ha retschavì oz en damaun en la sala da la Regenza las victuras ed ils victurs dal premi da la ARGE ALP 2022. En il rom da la 53. Conferenza da las scheffas e dals schefs da las regenzas da la Cuminanza da lavur da las regiuns alpinas (ARGE ALP) a Puntina èn gist dus projects innovativs per la protecziun dal clima dal Grischun vegnids premiads en questa concurrenza internaziunala.
La crisa dal clima sco er la superaziun da quella èn sfidas spezialas, a las qualas l'entir territori alpin sto far frunt. Ina contribuziun latiers duess er prestar il premi da la ARGE ALP per la protecziun dal clima da quest onn. En il rom d'ina concurrenza internaziunala èn vegnids tschertgads projects progressivs en ils secturs da la persistenza e da la protecziun dal clima – e vegnids chattads spezialmain en il Grischun.
Ideas cooperativas dal Grischun han success
En las trais categorias da project «projects gronds», «start-ups» e «grassroots» han persvadì gist dus projects innovativs grischuns. Il project grond «myclimate Klimafonds Davos» da l'iniziant Reto Branschi, il directur da turissem da la destinaziun Tavau Claustra, ha persvadì la giuria internaziunala cun ses aspect cumplessiv. Il «Klimafonds Davos» n'integrescha betg mo furniturs da prestaziuns turisticas, mabain er furniturs indirects sco il commerzi ed il mastergn. Ultra da quai suttastritga il sustegn da la vischnanca da Tavau il princip general da la strategia da clima per il lieu turistic Tavau.
Cun in caracter gist uschè cuminaivel ha il project «e-cyclus – Dapli recicladi. Damain rument» persvadì la giuria. Cun lur idea han ils interprendiders giuvens Amin Casutt e ses partenaris en mira in'economia circulara cumplessiva e digitalisada. Sur in'app duain tut ils ruments reciclabels pudair vegnir dismess directamain davent da chasa, e quai en moda confortabla ed economica. Ils ruments vegnan retratgs sur transports vids. Purschiders da servetschs, vischnancas ed interpresas da recicladi profiteschan d'infurmaziuns digitalas e d'ina applicaziun dals meds cun cleras finamiras. Cun l'utilisaziun da tools digitals duain plinavant vegnir illustrads ils fastizs persunals da rument e da resursas ed i duai vegnir evità rument.
Retschaviment uffizial en la sala da la Regenza
Cun in retschaviment uffizial da las victuras e dals victurs en la sala da la Regenza ha il cusseglier guvernativ Christian Rathgeb exprimì la gronda stima dal chantun Grischun. En il rom da l'occurrenza han ils giasts gì la pussaivladad da preschentar lur projects victurs. Suandada è ina discussiun captivanta davart las ideas innovativas. Silsuenter èn las victuras ed ils victurs sa rendids ensemen cun il cusseglier guvernativ Christian Rathgeb ad in gentar cuminaivel.
Fotografia agiuntada:
Da sanestra: incumbensà per relaziuns externas Carlo Crameri, responsabels per il project e-cyclus, responsabels per il project Klimafonds Davos, cusseglier guvernativ dr. Christian Rathgeb e chancelier Daniel Spadin.
Infurmaziuns:
Cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
Responsabladad: Regenza