Las lavurs da rumida e da reparaziun suenter la bova tranter Castaneda e Molina èn sin buna via. L'Uffizi da construcziun bassa (UCB) ha buna speranza da pudair dar liber la via la fin d'emna sin in vial.
Sin ina lunghezza da var 150 meters han crappuns cuvert la via la dumengia en damaun. Sin ina lunghezza da var 30 meters ha la crappa ch'è crudada giu, donnegià per part fermamain la via, ils mirs da sustegn da la vart da la muntogna e da la vart da la val sco er il cordun dal mir. Singuls crappuns èn crudads sur la via da Calanca fin giu en la Calancasca.
La via è gia rumida
Suenter las emprimas examinaziuns geologicas e suenter avair dà liber il lieu da privel, han chavaterras grevs cumenzà il mardi a mezdi cun las lavurs da rumida. Las lavurs èn vegnidas prendidas per mauns da tuttas duas varts da la bova ed han pudì vegnir terminadas gia la mesemna suentermezdi.
Sco proxim vegnan ussa montadas palissadas da protecziun da la vart da la muntogna en la zona da privel principala sin ina lunghezza da var 50 meters. Questas construcziuns d'atschal ch'èn 2 meters autas, èn ina contribuziun considerabla per la segirezza stradala sin quest traject.
Avertura d'in vial da la via para realistic per la fin d'emna
Il proxim pass è da metter ina cuvrida provisorica per stuppar las foras per part profundas en la via, per che la via saja puspè en urden per il traffic. La cuvrida vegn reparada il pli baud la gievgia suentermezdi, uschespert che l'installaziun da las palissadas da protecziun è terminada.
La plievgia prognostitgada per la notg da gievgia sin venderdi po retardar las lavurs: En quest cas pudess nova crappa crudar or dal sectur da la gonda, ed er la reparaziun da la cuvrida dependa fermamain da la situaziun da l'aura. En cas ch'i na fiss betg pussaivel da reparar la cuvrida fin venderdi, vegn il UCB a meglierar provisoricamain la via cun sablun grop, uschia ch'ella è charrabla. Sche la segirezza stradala permetta quai, po la via pia vegnir averta la fin d'emna sin in vial.
Fotografias agiuntadas:
Las lavurs da rumida han gia pudì vegnir terminadas la mesemna a mezdi.
Maletg: Uffizi da construcziun bassa dal Grischun
Infurmaziuns:
- Sven Fehler, manader Projectaziun/construcziun dal district 2 Mesauc, Uffizi da construcziun bassa, tel. +41 91 822 81 20, e‑mail Sven.Fehler@tba.gr.ch
- Andrea Peduzzi, schef dal district 2 Mesauc, Uffizi da construcziun bassa, tel. +41 91 822 81 15, e‑mail Andrea.Peduzzi@tba.gr.ch
Responsabladad: Uffizi da construcziun bassa