Navigation

Inhaltsbereich

  • Erste Mitteilung
  • Neuen Beitrag einfügen

Per il Program interchantunal da prevenziun e da diagnosa tempriva da la dependenza da gieus per daners è da nov responsabla la Scola auta spezialisada da la Svizra Orientala OST. La purschida da cussegliaziun per il Grischun cuntinuescha.

Dapi l'onn 2010 prenda il Grischun ensemen cun ils chantuns da la Svizra Orientala ed il Principadi da Liechtenstein mesiras da prevenziun cunter gieus per daners excessivs. A partir da la proxima perioda da prestaziun 2023 e 2024 è la Scola auta spezialisada da la Svizra Orientala OST responsabla per la direcziun dal program.

La purschida da cussegliaziun cuntinuescha
Il Program da prevenziun s'occupa da tut las furmas da gieus da fortuna, sco per exempel il lotto, las lottarias cun numers zuppads, las scumessas da sport, ils gieus da fortuna en casinos sco er tals en l'internet. La purschida sa drizza a persunas pertutgadas ed a lur confamigliars sco er a la publicitad ed a persunas spezialisadas.

Cun il program stattan a disposiziun purschidas multifaras a tut las abitantas ed a tut ils abitants dal chantun Grischun: la pagina d'internet plurilingua www.sos-spielsucht.ch, la helpline al telefon durant 24 uras (0800 040 080), la cussegliaziun online, infurmaziuns davart in cumportament problematic tar gieus ed indicaziuns davart tut las purschidas da cussegliaziun chantunalas. Las purschidas cumpiglian er tools per l'agid a sasez, campagnas da sensibilisaziun e documents per l'instrucziun.

Uschia survegnan persunas pertutgadas e confamigliars en la regiun da la Svizra Orientala e dal Principadi da Liechtenstein svelt e facilmain emprim agid sco er infurmaziuns davart ils gieus per daners.

Ulteriuras infurmaziuns chattais Vus sin la pagina d'internet da l'Uffizi chantunal dal servetsch social.

Infurmaziuns:

  • Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 10.30 fin las 12.00), e‑mail Susanna.Gadient@soa.gr.ch
  • Pascal Gian Caminada, collavuratur scientific/manader da project, Uffizi dal servetsch social dal Grischun, tel. +41 81 257 26 94 (cuntanschibel da las 10.30 fin las 12.00), e‑mail PascalGian.Caminada@soa.gr.ch
Responsabladad: Uffizi dal servetsch social
Neuer Artikel