Dapi il schaner 2023 pon famiglias cun cundiziuns da partenza difficilas profitar en set vischnancas grischunas dal program da visitas a chasa preventivas «PAT – Emprender cun ils geniturs». Trenadras da geniturs scoladas sustegnan las famiglias gia a partir da la gravidanza. La finamira è quella d'augmentar las schanzas da furmaziun dals uffants cun agid da mesiras preventivas.
Per mintga famiglia po il mintgadi cun uffants pitschens esser ina sfida e temporarmain er engrevgiant. In sustegn entaifer ed ordaifer la famiglia gida. El porscha temp e spazi a la famiglia per s'occupar dals basegns dals uffants. Sch'in tal sustegn manca e sch'i vegnan vitiers grondas grevezzas sco quitads finanzials, restricziuns da la sanadad, conflicts en il partenadi, relaziuns d'abitar fitg stretgas u mancanza d'enconuschientschas linguisticas, po quai avair a lunga vista consequenzas per ils uffants. Tals problems permanents engrevgeschan fermamain las famiglias pertutgadas e las difficulteschan da stgaffir in ambient interessant e senza stress per l'uffant. D'etablir ina relaziun cun l'uffant ch'è marcada da confidenza, vegn franà. Quests facturs èn fitg impurtants cunzunt durant ils emprims onns da vita, per che l'uffant possia sa sviluppar en moda sauna e confurma a sia vegliadetgna. Il program «PAT – Emprender cun ils geniturs» focussescha exactamain sin questa finamira. Las resursas e las cumpetenzas educativas da las famiglias pertutgadas vegnan rinforzadas grazia a las visitas a chasa regularas tras trenadras da geniturs scoladas. Ellas cusseglian las famiglias pertutgant l'agen potenzial individual da quellas. Ellas porschan support e motivaziun. Grazia ad inscunters mensils supplementars sa collian las famiglias en ina rait ed emprendan d'enconuscher las purschidas ed ils posts da consultaziun en lur conturns.
Cumprovà efficacitad da lunga durada
Gia en scolina perdan blers uffants da famiglias dischavantagiadas la colliaziun. Pli tard, en il mintgadi da scola, na pon quests deficits strusch pli vegnir cumpensads. Rinforzar a temp ina famiglia engrevgiada, sa paja a lunga vista. Il studi da lunga durada ZEPPELIN che analisescha l'efficacitad dal program PAT en famiglias cun grevezzas psicosocialas a pli lunga vista, mussa effects positivs er anc plirs onns suenter la fin da l'intervenziun. Ils resultats dal studi mussan, che uffants da famiglias ch'èn vegnidas accumpagnadas cun il program PAT, han meglras cumpetenzas dal tudestg e da la matematica, in'autoregulaziun pli intensiva e main problems da cumportament. Ils geniturs èn rinforzads en lur cumpetenzas educativas. Quests resultats èn fitg empermettents sut l'aspect da la finamira a lunga vista d'augmentar las schanzas da furmaziun tras mesiras preventivas.
Vischnancas grischunas lantschan «PAT – Emprender cun ils geniturs»
Il program vegn purschì da Pro Junior per incumbensa dal chantun e da las vischnancas da pilot. A Cuira ed a Tavau, che fan part dal program gia dapi l'onn 2022, profitan da quel gia 13 famiglias cun tut en tut 27 uffants. En las vischnancas da Favugn, Puntraschigna, San Murezzan, Schlarigna e Segl è il program vegnì lantschà il cumenzament da l'onn 2023.
Ulteriuras infurmaziuns: PAT www.projunior-gr.ch
Infurmaziuns:
Denise Rudin, manadra da partiziun Post spezialisà per la promoziun da la sanadad, Uffizi da sanadad, tel. +41 81 257 64 02 (cuntanschibla da las 8.00 fin las 12.00), e‑mail Denise.Rudin@san.gr.ch
Responsabladad: Uffizi da sanadad