Il Grischun porscha a partir d'immediat a tut las victimas da violenza ina «Ura da consultaziun Forensic Nursing». Uschia duain persunas pertutgadas da violenza survegnir in instrument per pudair cumprovar meglier avant dretgira e tar autras autoritads ch'ellas èn stadas victimas da violenza. En la Svizra tudestga è la purschida a l'Ospital chantunal dal Grischun a Cuira l'emprima da quest gener. Ella vegn finanziada dal chantun Grischun sur ina incarica da prestaziun da 4 onns.
Tgi che daventa victima d'in act da violenza, ha savens problems da cumprovar quai pli tard. En spezial en il sectur da la violenza a chasa èsi difficil per la persuna pertutgada da violenza da far valair attatgas ed acts da violenza davant dretgira, perquai ch'i sa tracta per il solit d'uschenumnads delicts da quatter egls senza perditgas. Savens stat deposiziun cunter deposiziun. En la «Ura da consultaziun Forensic Nursing» vegnan las victimas da violenza examinadas e survegnan ina documentaziun da las violaziuns che pon vegnir preschentadas a la dretgira sco med da cumprova. Ultra da quai vegnan las victimas infurmadas davart ulteriuras purschidas d'agid.
La purschida gratuita, confidenziala ed ambulanta stat a disposiziun a tut las victimas da violenza che han subì tras in malfatg ina periclitaziun immediata da l'integritad corporala, psichica u sexuala. In'annunzia tar la polizia n'è nagina premissa per pudair profitar da la purschida..
Emprima purschida en la Svizra tudestga
Il chantun Grischun finanziescha la «Ura da consultaziun Forensic Nursing» da l'Ospital chantunal dal Grischun en il rom d'ina incarica da prestaziun cun ina durada da 4 onns. La purschida sa drizza a tut las victimas da violenza en l'entir chantun ed è per entant disponibla al lieu principal da l'Ospital chantunal a Cuira. Sche necessari duai l'ura da consultaziun vegnir extendida sin ulteriuras instituziuns da sanadad en il chantun.
Cun la «Ura da consultaziun Forensic Nursing» ademplescha il chantun Grischun in'ulteriura pretensiun da la Convenziun dal Cussegl da l'Europa davart la prevenziun ed il cumbat cunter la violenza envers dunnas e la violenza a chasa (Convenziun dad Istanbul). En la Svizra tudestga è la «Ura da consultaziun Forensic Nursing» l'emprima purschida cumplessiva da quest gener. Purschidas sumegliantas existan gia en la Svizra franzosa.
Infurmaziuns:
- Sabina Altermatt, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11 (cuntanschibla da las 10.00 fin las 12.00), e‑mail Sabina.Altermatt@soa.gr.ch
- Marc Bollmann, schefmedi da l'Institut per medischina legala, Ospital chantunal dal Grischun, tel. +41 81 256 74 63 (cuntanschibel a partir da las 10.00), e‑mail forensicnursing@ksgr.ch
Responsabladad: Uffizi dal servetsch social
Infurmaziuns cumplementaras: Essas Vus victima da violenza? – Qua survegnis Vus agid, sustegn e protecziun
- Dapli infurmaziuns davart violenza a chasa sin la pagina d'internet da l'Uffizi dal servetsch social dal Grischun
- Ura da consultaziun Forensic Nursing, Ospital chantunal dal Grischun, tel. +41 79 923 11 44
- Agid a victimas, tel. +41 81 257 31 50
- Chasa da dunnas, tel. +41 81 252 38 02
- Cussegliaziun per uffants e giuvenils, tel. 147
- Clom d'urgenza per geniturs, tel. +41 848 35 45 55
- Polizia, tel. 117