La Regenza ha concedì ina contribuziun chantunala per in project da la transfurmaziun digitala en la destinaziun Arosa Lai ed approvà in project collectiv per la prevenziun cunter incendis da guaud.
Contribuziun chantunala per in project da la transfurmaziun digitala en la destinaziun Arosa Lai
La Regenza ha garantì a la societad simpla
«aI.digital» ina contribuziun chantunala da 2,13 milliuns francs per il project
digital «Arosa Lenzerheide – Ökosystem (aI.digital)». Ella ha deliberà questa
contribuziun en il rom da la Lescha davart la promoziun da la
transfurmaziun digitala en il Grischun. Per la perioda 2023–2027
èn calculads custs da var 6,5 milliuns francs per il project.
La societad simpla consista da las interpresas
Lenzerheide Marketing Support SA, Telefericas Lai SA, Telefericas Arosa SA e
d'Arosa turissem. Fin ussa han tut ils partenaris investì meds finanzials per
sviluppar ed administrar atgnas applicaziuns digitalas. Questas differentas
soluziuns digitalas individualas funcziunan da princip, na pon dentant betg
trair a niz l'entir potenzial. Ils differents sistems èn stads fin ussa in
impediment per cumbinar e colliar las purschidas existentas cun novas
purschidas. En il rom dal project «aI.digital» èsi perquai central d'optimar
las datas ed ils process che pertutgan tuttas duas destinaziuns. Quai vala tant
per ils giasts sco er per ils partenaris, sco per exempel ils furniturs da
prestaziuns e las vischnancas da la destinaziun Arosa Lai. Las experientschas
digitalas dals giasts duain vegnir facilitadas, meglieradas, individualisadas e
rendidas pli interessantas.
Ulteriuras infurmaziuns: https://grdigital.digital/
© Societad simpla «aI.digital»
La Regenza ha garantì a la societad simpla «aI.digital» ina contribuziun chantunala da 2,13 milliuns francs per il project digital «Arosa Lenzerheide – Ökosystem (aI.digital)».
Approvà in project per la reparaziun da vias da guaud per la prevenziun cunter incendis da guaud
La Regenza ha approvà il
project «Reparaziun d'averturas e prevenziun cunter incendis da guaud 2023», in
project collectiv da differentas vischnancas. Per quest intent ha ella concedì
ina contribuziun chantunala da circa 8,45 milliuns francs.
Il project cumpiglia la reparaziun da vias da
guaud e da vias da maschinas d'ina lunghezza totala da 45,5 kilometers.
Questas vias èn repartidas sin 45 objects singuls. Tras quai vegn meglierada
l'avertura da circa 6400 hectaras guaud da protecziun e da circa
1900 hectaras ulteriur guaud. Plinavant cumpiglia quest project collectiv
l'acquisiziun da material da stizzar fieu per las 12 basas da pumpiers
regiunalas per incendis da guaud.
© Renato Deflorin
La Regenza ha approvà il project «Reparaziun d'averturas e prevenziun cunter incendis da guaud 2023», in project collectiv da differentas vischnancas. Per quest intent ha ella concedì ina contribuziun chantunala da circa 8,45 milliuns francs.
