Represchentantas e represchentants da la Confederaziun, dal chantun, da las regiuns e da las vischnancas èn sa radunads gievgia, ils 9 da mars 2023, a la terza maisa radunda. Vegnids discutads èn il traffic da guntgida per lung da la A13 e da la A28 sco er la preparaziun per in volumen da traffic pli grond durant ils firads da primavaira.
Per ils firads da primavaira quintan las expertas ed ils experts cun in volumen da traffic concentrà durant singuls dis. Ellas ed els partan dal fatg ch'i vegnia a dar temporarmain fitg bler traffic. Sin basa da las experientschas spetgan las expertas ed ils experts, che differents currents da traffic da temp liber vegnian a sa cruschar. Quai pretenda mesiras cumplementaras che pertutgan l'entir territori per lung da la A13 da Tusaun fin Ragaz Bogn sco er per lung da la A28 fin Jenaz en il Partenz Davant.
Sin la A13 en direcziun nord èn previsas mesiras en il territori da Tusaun Nord, quai per impedir ch'il traffic da transit passia da la vart sanestra e dretga dal Rain tras ils vitgs da la Tumleastga. Las medemas mesiras duain valair a las sortidas Zizers, Cuira Nord, Cuira Sid e Reichenau per il traffic da guntgida che charrescha vers sid. Per lung da la A28 vegnan cuntinuadas las mesiras da l'emprova da pilot da la stagiun d'enviern 2022/23 (communicaziun a las medias dals 20-12-2022).
Emprova da pilot da l'enviern
En il rom d'ina emprova da pilot ha l'Uffizi da construcziun bassa (UCB) serrà, dapi la midada da l'onn 2022/23, durant sis dumengias las sortidas dal Partenz Davant (per lung da la A28), quai en collavuraziun cun la Polizia chantunala dal Grischun e cun l'Uffizi federal da vias (UVIAS). Supplementarmain è vegnì endrizzà in indriz per dosar il traffic davant l'entrada dal vitg da Zizers en direcziun nord. L'intent è stà da distgargiar las zonas d'abitadi dal traffic da transit ed uschia da proteger la populaziun cunter immissiuns supplementaras. A medem temp ha pudì vegnir garantida la circulaziun da las organisaziuns a glisch blaua sco er dal traffic public entaifer ils vitgs.
Il chantun Son Gagl è medemamain involvì en il project da pilot. En coordinaziun cun il chantun Grischun ha el prendì mesiras cumplementaras a l'entrada da Ragaz Bogn per impedir il traffic da transit. Questa mesira duai cuntinuar fin la fin dals dis da Pasca.
Evaluaziun suenter ils dis da Pasca
Ina influenza decisiva sin il cumportament da viadi ed uschia sin la prognosa dal traffic ha la situaziun da l'aura. L'evaluaziun definitiva è perquai previsa suenter ils dis da Pasca, cunquai ch'igl è pussaivel pir lura da far constataziuns objectivas sin basa da las cifras da traffic mesiradas ed evaluadas. Gia ussa èsi però cler ch'i na dat naginas soluziuns idealas, perquai che mintga mesira realisada cuntegna novas sfidas.
Infurmaziuns:
Reto Knuchel, inschigner chantunal, Uffizi da construcziun bassa dal Grischun, tel. +41 81 257 37 01 (cuntanschibel da las 08.00 fin las 10.00 e da las 14.00 fin las 16.00), e‑mail Reto.Knuchel@tba.gr.ch
Responsabladad: Uffizi da construcziun bassa