Per il project «graubünden Bike 2023–2026» ha la Regenza concedì a la firma Allegra International SA a Puntraschigna ina contribuziun chantunala da totalmain 2,5 milliuns francs en il rom da la Nova politica regiunala da la Confederaziun (NPR). La contribuziun NPR vegn pajada mintgamai per la mesadad da la Confederaziun e dal chantun.

Cun realisar «graubünden Bike 2023–2026» metta il Grischun in ulteriur accent sin il svilup dal traffic betg motorisà. Cun ils projects da svilup strategics «graubünden Bike» (2010–2015), «E-Mountainbike Graubünden» (2017–2020), «graubünden Hike» (2015–2020) e «graubünden Trailrun» (2020–2023) ha il chantun Grischun acquistà ils ultims onns in cler avantatg da concurrenza. Sco pionier vali ussa d'auzar las investiziuns per augmentar il grad d'enconuschientscha, per approfundar la tgira da las relaziuns cun la clientella e per meglierar la cuntentientscha da la clientella. Il project «graubünden Bike 2023–2026» na cumpiglia betg mo il traffic da temp liber, mabain er il traffic quotidian, perquai che las possessuras ed ils possessurs d'abitaziuns secundaras sco er ils giasts (giasts dal di e giasts che pernotteschan) dovran en lur mintgadi privat e professiunal adina pli savens il velo.

© Filip Zuan

La Regenza grischuna è s'occupada da la Sessiun dals giuvenils dal Grischun 2022. L'october èn circa 50 giuvenils sa fatschentads durant dus dis activamain cun l'avegnir dal chantun. Suenter debattas intensivas ha il plenum la finala deliberà quattordesch pretensiuns, dus statements ed ina petiziun, ch'èn vegnids surdads al president da la Regenza ch'era medemamain preschent. Ils giuvenils èn s'occupads dals secturs tematics societad, sanadad sco er spazi da viver, ambient ed energia. En il rom d'ina communicaziun al comité d'organisaziun da la Sessiun dals giuvenils ha la Regenza prendì posiziun davart il cuntegn da tut las propostas dals giuvenils.

Posiziun

© Jugendsession-GR.ch

La Regenza ha approvà las revisiuns parzialas da las planisaziuns localas concludidas da la citad da Cuira (17 da november 2022) e da la vischnanca da Churwalden (8 da december 2022). Tras l'approvaziun dals plans generals d'avertura vegnan stgaffidas las premissas da la planisaziun d'utilisaziun per la nova pendiculara Cuira–Brambrüesch.

La nova pendiculara duai garantir a lunga vista ina colliaziun directa da Cuira a Brambrüesch. Plinavant duai la populaziun creschenta da la citad pudair disponer d'in territori da recreaziun vischin che po vegnir utilisà pli facilmain. Per quest intent duai la nova pendiculara vegnir construida sin in nov trassé che maina sur Fülian (e betg pli sur il Känzeli) fin a Brambrüesch.

© Andrea Badrutt Chur

Per collocar ad interim persunas ucranaisas che tschertgan protecziun, cumpra il chantun Grischun in alloschi provisoric da la firma Uffer SA da Savognin per var 2,37 milliuns francs. Gia il 1. da zercladur 2022 aveva il chantun pudì prender en locaziun l'alloschi ch'è situà sin l'areal da la Scola chantunala Cuira, per collocar urgentamain las persunas che tschertgavan protecziun. Dapi lura ha il stabiliment pudì vegnir utilisà sco center da transit. Actualmain èn collocadas là tut en tut 120 persunas ucranaisas che dovran protecziun, tranter quellas er 60 uffants. Il pavigliun cunfinant ch'è en proprietad dal chantun vegn duvrà sco local da cuminanza per las abitantas ed ils abitants.

L'edifizi da lain consista da totalmain 102 moduls prefabritgads ed era vegnì construì oriundamain en il rom da la renovaziun dal convict da la Scola chantunala. El è vegnì duvrà sco alloschi provisoric per las scolaras externas ed ils scolars externs da la Scola chantunala ed era vegnì prendì en locaziun dal chantun fin l'october 2020. Ils moduls da l'alloschi èn d'auta qualitad ed èn vegnids producids per ina durada da vita d'almain 25 fin 30 onns. Perquai pon els vegnir utilisads anc ditg er per auters intents.

Per renovar la via da Heuberg davent dal spartavias Rona fin Arflina ha la Regenza concedì a l'Associaziun da construcziun da la via da Heuberg ed a l'Associaziun da mantegniment da la via d'Arflina ina contribuziun chantunala maximala da 543 510 francs.

Ils custs subvenziunabels importan 1,83 milliuns francs. Tenor la resposta preliminara lianta da l'Uffizi federal d'agricultura importa la tariffa da contribuziun da la Confederaziun 37 pertschient. Uschia resulta ina contribuziun federala probabla da maximalmain 677 100 francs. Las contribuziuns da la Confederaziun premettan ina cuntraprestaziun chantunala. La tariffa da la contribuziun chantunala necessaria importa 29,7 pertschient. Uschia resulta ina contribuziun chantunala probabla da maximalmain 543 510 francs.

© Christophe Trüb