Communicaziun da la Regenza dals 20 d'avrigl 2023
- Seiteninformationen
- Erste Mitteilung
- Neuen Beitrag einfügen
La Regenza ha dà glisch verda al nov studi da joint master «Digital Communication and Creative Media Production» da la Scola auta spezialisada dal Grischun en cooperaziun cun l'Universitad da Friburg. Ultra da quai ha ella prendì enconuschientscha dals projects da votaziun federals dals 18 da zercladur 2023.
Glisch verda per il nov studi da master «Digital Communication and Creative Media Production» da la Scola auta spezialisada dal Grischun
A partir dal cumenzament da l'onn da scola 2023/24 po la Scola auta spezialisada dal Grischun (SASGR) porscher il studi da joint master «Digital Communication and Creative Media Production». Quest studi da joint master vegn preparà e realisà en stretga collavuraziun cun l'Universitad da Friburg. L'introducziun da quest studi permetta er da persequitar finamiras da la Regenza dal sectur central «digitalisaziun ed innovaziun» tenor il Program da la Regenza 2021–2024.
A las studentas ed als students che fan in bachelor en «Multimedia Production» a la SASGR pussibilitescha il studi «Digital Communication and Creative Media Production» d'approfundar las enconuschientschas gia acquistadas. Plinavant permetta il studi a tut las persunas che han acquistà – en ina scola auta svizra – in diplom da bachelor renconuschì en scienza da medias e/u da communicaziun, d'extender a la SASGR las enconuschientschas en il sectur da las structuras e da las proceduras da communicaziun futuras. Areguard il cuntegn metta il studi il focus sin la midada da structura da la communicaziun da la societad en ils secturs commerzials, publics e privats. Questa midada da structura stat en connex cun la digitalisaziun ed è cumplexa e profunda.
©STEMUTZ.COM
A partir dal cumenzament da l'onn da scola 2023/24 po la Scola auta
spezialisada dal Grischun (SASGR) porscher il studi da joint master «Digital
Communication and Creative Media Production».
Projects da votaziun dals 18 da zercladur 2023
La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 18 da zercladur 2023:
- conclus federal dals 16 da december 2022 davart l'imposiziun speziala da las grondas gruppas d'interpresas (realisaziun dal project OECD/G20 davart l'imposiziun da las grondas gruppas d'interpresas) (Fegl uffizial federal 2022 3216);
- Lescha federala dals 30 da settember 2022 davart las finamiras en la protecziun dal clima, davart l'innovaziun e davart il rinforzament da la segirezza energetica (LCl) (Fegl uffizial federal 2022 2403);
- midada dals 16 da december 2022 da la Lescha federala davart las basas legalas da las ordinaziuns dal Cussegl federal per superar l'epidemia da COVID-19 (Lescha COVID-19) (CULF 2022 817).
Sin plaun chantunal n'èn previs nagins projects da votaziun per ils 18 da zercladur 2023.
Neuer Artikel
Responsabladad: Regenza