Sin invit da la Regenza grischuna ha la Regenza dal Principadi da Liechtenstein visità ier saira il chantun Grischun.
La Regenza grischuna ha pudì beneventar ier saira a Cuira la Regenza dal Principadi da Liechtenstein. Il schef da la Regenza Daniel Risch è vegnì accumpagnà da las cusseglieras guvernativas Sabine Monauni, Graziella Marok-Wachter sco er dal cusseglier guvernativ Manuel Frick, dal secretari da la Regenza Horst Schädler e da l'ambassadura Doris Frick. Suenter in discurs da lavur en la sala da la Regenza è ina visita guidada en il Museum d'art stada sin il program. Ina tschaina cuminaivla en il café dal museum ha cumplettà la scuntrada d'omaduas Regenzas.
Las Regenzas dal Grischun e dal Liechtenstein han gia adina tgirà stretgas relaziuns amicablas. Pir dacurt è quai sa manifestà spezialmain a chaschun da las festivitads per il giubileum da 100 onns dal contract da duana tranter la Svizra ed il Principadi da Liechtenstein. La visitas annualas da las Regenzas servan a tgirar questas relaziuns ed a barattar experientschas sin ils champs da la cultura, da l'economia e da la politica.
Fotografias agiuntadas:
Il president da la Regenza Peter Peyer (a dretga) beneventa cordialmain il schef da la Regenza Daniel Risch en il Grischun.
Infurmaziuns:
President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel fin las 11.00), e‑mail Peter.Peyer@djsg.gr.ch
Responsabladad: Regenza