L'ambassadura da la Republica da la Croazia, Andrea Bekić, ha visità oz – sin invit da la Regenza – il chantun Grischun.

L'ambassadura croata Andrea Bekić è vegnida beneventada oz en la Chasa grischa a Cuira dal president da la Regenza Peter Peyer e dal chancelier Daniel Spadin. L'ambassadura è vegnida accumpagnada da ses um Darko Bekić e da l'emprim secretari da l'ambassada Tomislav Tudić. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografias agiuntadas:

Da sanestra: Chancelier Daniel Spadin, dr. Darko Bekić, ambassadura Andrea Bekić, president da la Regenza Peter Peyer e emprim secretari Tomislav Tudić

Infurmaziuns:

President da la Regenza Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch

Responsabladad: Regenza