Dals 12 fin ils 15 da zercladur 2023 vegn il Cussegl grond a salvar sia sessiun extra muros a Claustra. Questa sessiun vegn actualmain preparada cun tutta forza.

Ina giada per legislatura salva il Cussegl grond ina sessiun ordaifer Cuira, quai per tgirar il contact direct tranter il parlament chantunal e la populaziun en las regiuns. Durant la sessiun d'avrigl 2022 ha il Cussegl grond tschernì Claustra sco lieu per la proxima sessiun extra muros. En il passà han gia gì lieu sessiuns extra muros a Mustér, Tavau, Landquart, Poschiavo, Samignun, Arosa e l'ultim a Puntraschigna.

Pop-up «Parlament»
Sco usità a chaschun da las sessiuns extra muros dura la sessiun a Claustra 4 dis, numnadamain da glindesdi, ils 12 da zercladur fin gievgia, ils 15 da zercladur 2023. Il parlament sa raduna en il center d'events Arena che vegn transfurmà ad interim en in center parlamentar cun sala da cussegl, tribuna publica, plazzas da lavur per las medias e foyer. Per l'infrastructura tecnica al lieu sco er per il program accumpagnant spezial durant la sessiun extra muros procura la vischnanca ospitanta, entant che l'ulteriura organisaziun è chaussa dal Secretariat dal Cussegl grond. Actualmain vegnan exequidas las lavurs preparatoricas cun tutta forza a Claustra e tar il Secretariat dal Cussegl grond.

Program accumpagnant varià
A Claustra survegnan las deputadas ed ils deputads l'occasiun d'emprender d'enconuscher meglier la regiun e la populaziun. Per quest intent ha la vischnanca da Claustra arranschà in program accumpagnant interessant e varià. En il center stat in apero la mesemna saira cun la participaziun da la populaziun indigena. Per las deputadas ed ils deputads èn ultra da quai previs glindesdi saira ina purschida da sport facultativa sco er mardi saira in program uffizial si Madrisa.

Glista da tractandas bain emplenida
Er las sessiuns extra muros servan en emprima lingia a la lavur parlamentara. Tranter auter stattan il quint dal chantun 2022 sco er differents rapports da gestiun 2022 sin la glista da tractandas. Plinavant sto il Cussegl grond eleger il presidi da la Regenza per l'onn 2024, far in'elecziun substitutiva per la Dretgira administrativa chantunala sco er determinar la dotaziun totala da plazzas per la nova Dretgira superiura. Vegnir tractads ston ultra da quai in rapport ed ina proposta da la Cumissiun dal Cussegl grond per ambient, traffic ed energia sco er pli che 50 intervenziuns parlamentaras. Sco usità èn las sesidas dal parlament publicas e persunas interessadas èn cordialmain envidadas da las persequitar davent da la tribuna dal public. Infurmaziuns detagliadas davart il manaschi parlamentar èn publitgadas sco usità sin la pagina d'internet dal Cussegl grond, la sessiun extra muros na vegn dentant betg transmessa live via stream.

Agiunta:

Fegl d'infurmaziun cun il program da la sessiun extra muros a Claustra

Infurmaziuns:

• President dal Cussegl grond Tarzisius Caviezel, tel. +41 79 610 23 70
• Hansueli Roth, president communal da Claustra, tel. +41 81 410 36 01
• Patrick Barandun, manader dal Secretariat dal Cussegl grond, Chanzlia chantunala, tel. +41 81 257 22 32 (cuntanschibel a partir da las 13.30)

Responsabladad: Cussegl grond / Chanzlia chantunala dal Grischun