La Svizra presidiescha l'onn 2023 per l'emprima giada la strategia macroregiunala da l'Uniun europeica per il territori alpin (EUSALP). Quella vegn realisada cuminaivlamain dals chantuns e da la Confederaziun. L'onn presidial è vegnì lantschà il mars en il chantun Friburg. Oz ha lieu a Scuol la conferenza internaziunala davart il tema «aua».

La regiun alpina ed uschia er la circulaziun alpina da l'aua èn pertutgadas spezialmain da la midada dal clima. Ils pajais da las Alps, lur regiuns e lur vischnancas èn confruntads cun la gronda sfida da garantir il provediment d'aua tant per la natira sco er per ils umans. La conferenza da la EUSALP en l'hotel Palace Scuol preschenta exempels pratics regiunals, co ch'ins po ir enturn cun questa sfida en il territori alpin. Sin basa d'enconuschientschas scientificas e d'exempels pratics concrets dals secturs «energia idraulica», «biodiversitad» e «turissem» sa fatschenta la conferenza tranter auter cun las cundiziuns generalas politicas per in bun management da l'aua.

Emprim presidi svizzer 2023
Cuminaivlamain surpiglian la Confederaziun ed ils chantuns l'onn 2023 per l'emprima giada il presidi da la EUSALP. En il center da l'onn presidial svizzer stattan trais temas transversals: «economia circulara», «aua» e «traffic/mobilitad». L'onn presidial svizzer è vegnì lantschà il mars en il chantun Friburg cun la conferenza da la EUSALP davart il tema «economia circulara». Il 1. da settember 2023 ha lieu a Lugano ina conferenza davart il tema «traffic/mobilitad». Terminà vegn l'onn presidial cun la radunanza generala da la EUSALP ils 18 e 19 d'october 2023 a Ragaz Bogn. Cun la Svizra vegn la EUSALP presidiada per l'emprima giada d'in stadi che n'è betg commember da la UE.

Collavuraziun transcunfinala
La strategia macroregiunala per il territori alpin (EUSALP) unescha set pajais e 48 regiuns. Ella ha la finamira da rinforzar la collavuraziun tranter las regiuns ed ils pajais en las Alps. Las particularitads e las sfidas cuminaivlas en il territori alpin pretendan ina collavuraziun transcunfinala activa.

Fotografias agiuntadas:

Agiunta:

Program da la conferenza

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel per telefon tranter las 14.00 fin las 15.00), e‑mail Jondomenic.Parolini@ekud.gr.ch

Responsabladad: Chanzlia chantunala