Sur la via da Malögia hai dà il mardi saira ina crudada da grippa. Sin l'autezza da Segl-Baselgia èn dus blocs pli gronds arrivads giu sin la via da Malögia. Fin che las lavurs da segirezza èn terminadas, resta la via tranter Segl Föglias e Plaun da Lej serrada per motivs da segirezza durant la notg, quai tranter las 21.00 e las 06.00.
En l'intschess grippus dal Blais Parè, var 700 meters sur la via da Malögia sin circa 2500 meters sur mar, è sa distatgada crappa il mardi saira. Sin quai èn dus singuls blocs arrivads giu sin la via da Malögia. In da quels è var 4 meters cubic grond e paisa circa 10 tonnas. Gia avant Tschuncaisma, ils 26 da matg, èn singuls craps pitschens crudads or da la medema zona da distatga fin giu sin la via.
Serrada da la via durant la notg fin che las lavurs da segirezza èn terminadas
Gia mez matg – suenter ina crudada da crappa – èn vegnidas prendidas differentas mesiras immediatas per garantir la segirezza dal traffic: Il rempar da lavinas existent ch'è 50 meters lung, è vegnì auzà. Plinavant èn vegnidas installadas palissadas d'atschal ch'èn circa 2 meter autas.
Pervia da la crudada da crappa dal mardi saira vegnan ussa extendidas las mesiras en la zona periclitada: In georadar duai furnir en il decurs da las proximas emnas e dals proxims mais enconuschientschas, sche respectivamain co che la crappa da la muntogna sa mova. Supplementarmain vegn installà in radar cunter crudada da crappa. Quel vegn connectà cun in sistem d'ampla sin la via. En cas da crudadas da crappa vegn la via uschia serrada automaticamain.
Questas lavurs duran previsiblamain fin il cumenzament da l'emna che vegn. Per motivs da segirezza resta la via serrada durant la notg, fin che las mesiras pon vegnir messas en funcziun, quai tranter Segl Föglias e Plaun da Lej e mintgamai da las 21.00 fin las 06.00.
Il traffic po passar durant il di
Fin che l'installaziun dal radar cunter crudada da crappa è terminada, vegn il lieu da privel surveglià da persunas. Perquai ch'il lieu da distatga sa chatta in vaira toc sur la via da Malögia, è il temp da reacziun avunda grond per pudair serrar la via entaifer secundas en cas d'urgenza. Grazia a questa mesira è la via dada libra per il traffic durant il di, e quai sut surveglianza.
Infurmaziuns actualas chattais Vus sut www.strassen.gr.ch.
Fotografia agiuntada:
La pli gronda part dal material da crudada è sa fermada en il fitg grond cugn da gonda al pe da la paraid-crap. Maletg: Uffizi da construcziun bassa dal Grischun.
Infurmaziuns:
Christoph Nänni, manader dal sectur Geologia e privels da la natira, Uffizi da construcziun bassa dal Grischun, tel. +41 81 257 38 33 (cuntanschibel da las 10.00 fin las 11.00), e‑mail Christoph.Naenni@tba.gr.ch
Responsabladad: Uffizi da construcziun bassa