La Regenza constatescha ch'ils deficits, che la CPI Cartel da construcziun aveva registrà tar l'administraziun chantunala, èn vegnids mess en urden cumplettamain. Ils posts pertutgads han realisà las recumandaziuns da la Cumissiun parlamentara d'inquisiziun e da las examinaziuns administrativas. Ils process e las organisaziuns èn vegnids adattads correspundentamain. Per la Regenza è il vast process d'analisa pia terminà.
Ils 13 da zercladur 2018 aveva il Cussegl grond nominà ina Cumissiun parlamentara d'inquisiziun (CPI) per sclerir la rolla da l'administraziun chantunala en connex cun il cartel da construcziun e cun il tractament dad A.Q. Tant ils rapports da la CPI sco er las examinaziuns administrativas ch'èn vegnidas fatgas per incumbensa da la Regenza, cuntegnan recumandaziuns per mauns da l'administraziun chantunala. En il rom d'in conclus ha la Regenza ussa prendì enconuschientscha dal fatg ch'ils posts da servetsch pertutgads – en spezial la Polizia chantunala, l'Autoritad per la protecziun d'uffants e da creschids (APUC) e l'Uffizi da construcziun bassa (UCB) – han analisà e realisà las recumandaziuns.
La Polizia chantunala e la APUC han adattà l'organisaziun ed ils process
La Polizia chantunala e la APUC han adattà ed optimà ils onns passads lur organisaziun e lur process. Plinavant è vegnì e vegn mess anc dapli paisa sin la furmaziun supplementara entaifer la Polizia chantunala. Sin fundament da las recumandaziuns vegn actualmain er installà in vast management chantunal da smanatschas (MCS) en il Grischun. Il MCS duai vegnir organisà tras in team central interdisciplinar che sa cumpona da persunas spezialisadas da la polizia, da la psicologia forensica e da la lavur sociala. Tut tenor la tematica duain tut las instituziuns essenzialas mintgamai esser represchentadas en ils teams da crisa e da cas. Cun scolar regularmain las collavuraturas ed ils collavuraturs duain enconuschientschas existentas e novas valurs d'experientscha vegnir integradas cuntinuadamain.
La Regenza ha prendì enconuschientscha dal rapport final dal Departament da giustia, segirezza e sanadad. Quest rapport dat in bun attestat a la Polizia chantunala. «Suenter il process d'analisa conscienzius pon ins dir oz, che la Polizia chantunala funcziuna bain e che sias collavuraturas e ses collavuraturs adempleschan bain lur incumbensas», di Peter Peyer, schef dal Departament da giustia, segirezza e sanadad. Quai sa mussia tranter auter er a maun dal pitschen dumber da recurs da surveglianza ch'èn vegnids inoltrads al departament durant ils ultims 10 onns. En media èn quai stads 1,3 recurs per onn.
La APUC è vegnida reorganisada per il 1. da schaner 2022. Or da tschintg autoritads per la protecziun d'uffants e da creschids independentas è vegnida furmada in'unica autoritad chantunala cun filialas regiunalas e cun ina pratica unitara. Suenter 5 onns è il process d'analisa terminà per il Departament da giustia, segirezza e sanadad.
Optimà vinavant ils process d'acquisiziun per cumbatter cunvegnas
In segund object d'investigaziun èn stads ils process chantunals da surdada, cunzunt quels dal UCB. Gia a partir da l'onn 2013 – parallelamain a las proceduras da la Cumissiun da concurrenza (CUMCO) – ha il departament cumpetent, numnadamain il Departament d'infrastructura, energia e mobilitad, analisà quests process areguard il tema da las cunvegnas da concurrenza e lura fatg las adattaziuns necessarias. Il program da controlla, ch'è vegnì implementà tar ses posts d'acquisiziun e che cumpiglia glistas da controlla, schemas da procedura e d'annunzia, è vegnì valità dal secretariat da la CUMCO l'onn 2020 sco «exemplaric» e «cunvegnent». Correspundentamain han tant la CPI sco er las duas examinaziuns administrativas chattà mo paucas pussaivladads per meglierar ils instruments e las mesiras introducidas. En il fratemp èn questas meglieraziuns vegnidas realisadas resp. prendidas per mauns. Ulteriuras recumandaziuns dals rapports han plinavant pudì vegnir resguardadas en il rom da l'ultima revisiun da las prescripziuns d'acquisiziun, cunzunt tras l'introducziun d'in post independent per annunziar incunvegnientschas en il sectur da las acquisiziuns publicas. Singulas mesiras prendidas dal chantun, sco la sensibilisaziun dal persunal responsabel per las acquisiziuns u l'installaziun d'in monitoring, èn da natira duraivla e na pon perquai betg vegnir designadas sco terminadas. Per questas mesiras èn vegnids instradads ils pass necessaris cun l'intent da s'occupar a pli lunga vista da questa incumbensa.
Pervia dals meds fiscals considerabels che vegnan impundids en connex cun las acquisiziuns e pervia da las ristgas respectivas, vegn il chantun a dar er en l'avegnir in'attenziun speziala a quest tema. Medemamain vegn el a persequitar attentamain l'ulteriur decurs da l'inquisiziun currenta da la CUMCO cunter las interpresas pertutgadas en la Moesa. Cura ch'ils resultats da l'inquisiziun èn avant maun, vegn el ad examinar, sch'il chantun sto instradar pass giuridics.
Agiuntas:
Infurmaziuns:
- President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 15.00 fin las 16.00), e‑mail Peter.Peyer@djsg.gr.ch
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 13.00 fin las 14.00 e da las 16.00 fin las 17.00), e‑mail Carmelia.Maissen@diem.gr.ch
Responsabladad: Regenza