La Regenza ha prendì enconuschientscha dal concept per structurar la promoziun dal film en il chantun Grischun ed ha approvà il model per la promoziun dal film ch'è vegnì deducì da quest concept.

En il rom da l'elavuraziun dal concept per promover la cultura 2021 fin 2024 han ins constatà, che la promoziun da la cinematografia en il Grischun stoppia vegnir structurada e ch'i duaja vegnir elavurà in model per promover la realisaziun da projects da film. En vista a quests fatgs ha il cineast grischun Hercli Bundi elavurà per incumbensa da l'Uffizi da cultura in concept respectiv. Sin basa da quest concept ha la Promoziun da la cultura dal Grischun alura elavurà in model per la promoziun dal film. La promoziun cumpiglia tut las fasas da project, davent dal svilup dal scenari e dal project fin a la distribuziun.

Promovids duain vegnir projects da film, als quals èn participads cineastas e cineasts grischuns en posiziuns decisivas u ils quals han ina relaziun tematica suffizienta cun il chantun Grischun. Sustegnids vegnan en emprima lingia projects d'auta qualitad da cineastas e cineasts professiunals e da firmas da producziun, d'organisaturas e d'organisaturs d'occurrenzas da films e d'organisaziuns culturalas da film. Exclus da la promoziun èn percunter producziuns sulettamain commerzialas sco films da reclama e films d'incumbensa. Ils termins per inoltrar dumondas èn ils 10 da favrer, ils 10 da zercladur ed ils 10 d'october. Ils formulars d'annunzia èn disponibels sin la pagina d'internet da la Promoziun da la cultura dal Grischun (www.kfg.gr.ch). Las dumondas vegnan examinadas trais giadas per onn da la Promoziun da la cultura dal Grischun sco er da la Cumissiun chantunala da cultura e cun agid d'in expert da films.

© maletgs PD

La Regenza ha garantì a la vischnanca da Muntogna da Schons ina contribuziun chantunala da maximalmain 423 810 francs per sanar ses provediment d'aua.

Il provediment d'aua da la vischnanca da Muntogna da Schons cumpiglia tschintg sistems independents. Pervia da lur vegliadetgna ston ils stabiliments vegnir sanads per part cun mesiras pli vastas. In dals stabiliments ch'è vegnì pli vegl è il reservuar Orta en la fracziun da Lon (construì l'onn 1937). Il reservuar na correspunda betg pli a las pretensiuns d'ozendi e las reservas d'aua da diever e d'aua da stizzar fieu ch'èn avant maun, na pon betg cuvrir il basegn actual e futur. Ultra da quai èn las tschiffadas da las funtaunas sco er il conduct d'affluenza fin al reservuar en in stadi manglus. La realisaziun da las mesiras ch'èn previsas en il project «Remplazzament dal reservuar e da las tschiffadas da las funtaunas a Lon» è planisada sur ina perioda da 2 onns. L'onn 2023 duain – en in'emprima etappa – vegnir tschiffadas da nov las trais funtaunas existentas e vegnir remplazzadas las chombras d'aua sco er il conduct al reservuar. L'onn 2024 vegn alura remplazzà il reservuar. Il nov reservuar vegn construì en in auter lieu al vest dal reservuar existent. Per l'avertura dal reservuar sto vegnir construida ina nova via d'ina lunghezza da 240 meters.

La garanzia da la contribuziun chantunala premetta in subvenziunament correspundent tras la Confederaziun. L'Uffizi federal d'agricultura cumpetent ha gia empermess ina contribuziun federala da var 470 900 francs. Ils custs totals da la sanaziun vegnan calculads cun circa 1,7 milliuns francs.