Il chantun Grischun e la Conferenza da las regenzas chantunalas (CdC) organiseschan oz a Cuira – a chaschun dal giubileum da 30 onns da la CdC – in'occurrenza per giuvenils davart il tema politica d'Europa. L'occurrenza porscha a las scolaras ed als scolars da las scolas professiunalas e da las scolas medias ina plattafurma unica per discutar cun represchentantas e represchentants da regenzas chantunalas, da vischnancas e da l'economia davart las relaziuns tranter la Svizra e la UE.
Avant la radunanza plenara da la CdC, che ha lieu damaun venderdi a Bravuogn, organisescha il chantun Grischun ensemen cun la CdC in'occurrenza per giuvenils, che stat cumplainamain sut l'ensaina da la politica d'Europa. Sin il program stat in referat d'input davart las relaziuns tranter la UE e la Svizra, che vegn tegnì dal correspundent dad SRF Sebastian Ramspeck, sco er ina runda da discussiun, che debattescha davart l'impurtanza da la politica d'Europa per ils chantuns, las vischnancas e l'economia dal Grischun. A la runda da discussiun sa participeschan ultra da Sebastian Ramspeck, il cusseglier guvernativ Martin Bühler, Brigitte Küng, co-mainagestiun dal Forum economic dal Grischun, sco er Nora Saratz Cazin, presidenta communala da Puntraschigna.
Barat cun politicras giuvnas e politichers giuvens
Er represchentantas e represchentants da las partidas giuvnas dal Grischun han l'occasiun da far valair lur opiniuns davart temas da la politica d'Europa. En ina discussiun al podium vegnan discutads detagliadamain temas che pertutgan cunzunt persunas giuvnas. Suenter ha er il public la pussaivladad da far dumondas e da discutar cun las expertas ed ils experts. Per finir vegnan las visiuns e las speranzas dal public giuven, co che la Svizra pudess guardar or en 70 onns, pachetadas en ina capsla dal temp. Ellas stattan lura a disposiziun per il giubileum da 100 onns da la CdC.
Fotografias agiuntadas:
Fotografias da l'occurrenza
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 16.30 fin las 17.30), e‑mail Martin.Buehler@dfg.gr.ch
Responsabladad: Chanzlia chantunala