Las populaziuns da selvaschina d'ungla han pudì vegnir reducidas vinavant grazia a las bleras intervenziuns da chatscha dals ultims onns. En differentas regiuns dal chantun èn las populaziuns da tschiervs sin in nivel pli bass che anc avant paucs onns. En las regiuns cun in'auta preschientscha dal luf e dal luf-tscherver èn sa reducidas cleramain las populaziuns da chavriels ed en il guaud er las populaziuns da chamutschs. La chatscha presta ina contribuziun impurtanta per cuntanscher las finamiras ch'èn definidas en la strategia concernent il «Spazi da viver guaud-selvaschina 2021».

L'onn passà hai dà grondas intervenziuns da chatscha en bleras regiuns dal Grischun. Quai è sa reflectà cunzunt en la populaziun da primavaira dals tschiervs, ch'è stada sin plaun chantunal per 550 animals pli pitschna e che vegn stimada ad in dumber da 15 110 animals. Ultra da quai sa mussi en singulas regiuns, che las populaziuns da tschiervs, da chavriels ed en il guaud er da chamutschs vegnan reguladas cleramain er tras ils animals da rapina gronds.

Particularmain ils lufs han dentant er ina ferma influenza sin la repartiziun dals animals selvadis. Quai daventa pli e pli ina sfida per stimar las populaziuns da primavaira, per planisar la prelevaziun e per exequir la chatscha.

Regulaziun consequenta da las populaziuns da selvaschina d'ungla vinavant necessaria
Dapi l'onn 2020, che vala sco onn da partenza per las finamiras ch'èn definidas en la strategia concernent il «Spazi da viver guaud-selvaschina 2021», ha la populaziun chantunala da tschiervs pudì vegnir reducida per 7,2 % (1180 tschiervs). Quest svilup correspunda a las prescripziuns da chatscha da la strategia concernent il «Spazi da viver guaud-selvaschina 2021» e duai vegnir cuntinuà.

A la chatscha da quest onn duain vegnir sajettads tut en tut 5278 tschiervs (2022: 5430 tschiervs), da quels 3050 animals feminins (2022: 3145). La chatscha da chamutschs e da chavriels vegn ad avair lieu en la gronda part da las regiuns analogamain a l'onn precedent. La ferma reducziun da la populaziun da chavriels e da chamutschs en territoris da trieps da lufs e dal luf-tscherver vegn resguardada quest onn anc pli fitg cun restricziuns da chatscha correspundentas.

Regiunalisaziun da la chatscha d'ansiels-chavriel durant il settember
Ils onns passads han dastgà vegnir sajettads ansiels-chavriel durant ils ultims 4 dis da la chatscha auta. En tschertas regiuns dal chantun èn dentant las populaziuns da chavriels sa reducidas uschè ferm, che la chatscha d'ansiels-chavriel vegn franada durant la chatscha auta. Quai concerna las regiuns Surselva, Valragn e parts da las regiuns Mantogna e Grischun Central.

En auters territoris dal Grischun èn las populaziuns da chavriels anc adina mesaunas fin grondas. Ina chatscha suffizienta da chauras e d'ansiels-chavriel gida pia a meglierar la situaziun tranter il guaud e la selvaschina. Per garantir la regulaziun necessaria sche pussaivel durant la chatscha auta vegn mantegnida là la chatscha d'ansiels-chavriel durant ils ultims 4 dis da la chatscha auta.

Cun las spezias da chatscha bassa vai bain
Las populaziuns d'animals da chatscha bassa vegnan survegliadas en il Grischun tras in monitoring annual intensiv. Quest onn èn danovamain vegnidas dumbras bleras lieurs sco er giaglinas e cots da draussa. Quai mussa, che las populaziuns prospereschan bain e ch'ellas vegnan sajettadas en moda persistenta.

Las Prescripziuns da chatscha èn sa cumprovadas e vegnan cuntinuadas correspundentamain. Las chatschadras ed ils chatschaders èn conscients da lur responsabladad cun exequir questa chatscha e s'engaschan activamain per questas spezias cunzunt cun far lavurs da tgira.

Fotografias agiuntadas:

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 15.00 fin las 15.30), e‑mMail Carmelia.Maissen@diem.gr.ch
• Lukas Walser, manader da la partiziun Selvaschina e chatscha, Uffizi da chatscha e pestga, tel. +41 81 257 21 58 (cuntanschibel da las 10.00 fin las 12.00), e‑mail Lukas.Walser@ajf.gr.ch

Responsabladad: Regenza