L'Archiv dal stadi dal Grischun (Uffizi da cultura) sa legra da preschentar la publicaziun la pli nova en sia retscha Funtaunas e perscrutaziuns davart l'istorgia dal Grischun (FIG). Il Grischun ha bleras baselgias cun arvieuts artistics da la gotica tardiva. Cun tge tecnicas e materialias èn questas construcziuns cumplexas vegnidas realisadas? Tgi eran ils maisters constructurs che las han creadas? A questas dumondas sa deditgescha il cudesch.
A partir da la mesadad dal 15avel tschientaner èn vegnidas construidas adina dapli baselgias en il Grischun. Passa 100 baselgias èn vegnidas erigidas da nov u renovadas fundamentalmain. Las incumbensadras da questas construcziuns eran oravant tut las plaivs – bleras da quellas eran sezzas vegnidas fundadas pir dacurt. L'element caracteristic da las novas baselgias eran lur arvieuts artistics.
La planisaziun e la realisaziun da las construcziuns remartgablas dal tschiel sura stattan en il focus dal nov tom da las FIG. Registraziuns cumplexas da las construcziuns oriundas han gidà ad eruir la tecnica da construcziun da la gotica tardiva. Cun talas registraziuns daventa mintgamai l'ovra sezza cun sia substanza istorica la funtauna prioritara.
Fotografia agiuntada:
La baselgia Son Flurin a Ramosch è ina da las pli grondas baselgias da stil gotic tardiv en il Grischun. Ils gnervs da l'arvieut sa preschentan sco staila d'in asp.
Agiunta:
Infurmaziuns detagliadas davart il cudesch
Exemplars da recensiun pon vegnir dumandads sut Florian.Hitz@sag.gr.ch.
Vernissascha:
Glindesdi, ils 14 d'avust 2023, a las 18.30, en la Regulakirche a Cuira, cun aperitiv en la nav da la baselgia..
Infurmaziuns:
Responsabladad: Uffizi da cultura / Archiv dal stadi