La bova da Brinzauls sin il territori da la vischnanca d'Alvra vala sco in dals pli activs moviments d'ina spunda gronda en il territori alpin. Tras la construcziun d'ina gallaria da drenascha duain vegnir quietads ils moviments dal terren da la bova Vitg e las massas da grip instabilas da la bova Muntogna. La Regenza ha approvà la construcziun da la gallaria da drenascha. Las lavurs preparatoricas per questa gallaria cumenzan gia il settember.
La Regenza ha approvà il project Gallaria da drenascha. La Confederaziun ed il chantun han empermess ina contribuziun da 90% dals custs imputabels, che importan 39,8 milliuns francs. Ils meds finanzials per quest project èn vegnids reservads cun il conclus dal Cussegl grond dals 7 da december 2022 davart in credit d'impegn per la realisaziun d'ina gallaria da drenascha a Brinzauls. Ils custs restants duain vegnir repartids sin las partidas che profitan dal project. En la vischnanca d'Alvra vegn il project Gallaria da drenascha sustegnì fermamain. Gia ils 14 da fanadur 2023 ha la radunanza communala approvà il credit brut da 39,8 milliuns francs senza cuntravuschs.
Las lavurs preparatoricas cumenzan il settember
Tras la construcziun ed il manaschi da la gallaria da drenascha duain ils moviments dal terren da la bova Vitg vegnir reducids a sut 10 centimeters per onn e las massas da grip instabilas da la bova Muntogna duain vegnir quietadas. Per quest intent vegn la gallaria da sondagi existenta prolungada ed engrondida ad ina gallaria da drenascha d'ina lunghezza da tut en tut circa 2,2 kilometers.
Las lavurs preparatoricas per la deponia dal material d'exchavaziun duain cumenzar gia mez settember 2023. Las lavurs d'avanzament per la gallaria da drenascha èn planisadas a partir dal mars 2024. A la fin da l'onn 2027 duai la gallaria da drenascha vegnir messa en funcziun..
Malsegirezzas restan
Cun la gallaria da sondagi han ins pudì cumprovar, ch'igl è pussaivel d'allontanar l'aua dal grip stabil che sa chatta sut la massa glischnanta. Questas mesiras da drenascha han procurà, che las pressiuns da l'aua en il champ d'influenza da la gallaria da sondagi èn sa reducidas signifitgantamain, respectivamain èn svanidas cumplettamain en tscherts secturs. Quai ha effectuà ch'ils moviments da glischnada èn vegnids franads svelt. Ultra da quai mussan las mesiraziuns dals moviments, che la reducziun da las sveltezzas da la bova Vitg han in effect positiv sin las sveltezzas da la bova Muntogna e ch'i resulta er là ina reducziun da las sveltezzas.
Malgrà las enconuschientschas positivas da fin ussa datti er malsegirezzas areguard il grad d'efficacitad ed areguard il radius d'activitad da la gallaria da drenascha. Cun il stadi d'enconuschientschas actual na datti però nagina varianta alternativa per sanar la bova da Brinzauls, che avess schanzas da success pli u main cumparegliablas, che fiss tecnicamain realisabla ed a medem temp economica e che sa laschass implementar entaifer paucs onns.
Fotografias agiuntadas:
Perfurada da drenascha davent da la gallaria da sondagi en la massa glischnanta
Gallaria da sondagi da Brinzauls cun ventilaziun
© Uffizi da guaud e privels da la natira
Agiuntas:
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 10.30 fin las 11.30), e‑mail Carmelia.Maissen@diem.gr.ch
- Urban Maissen, selvicultur chantunal, manader da l'Uffizi da guaud e privels da la natira, tel. +41 81 257 38 51 (cuntanschibel da las 13.00 fin las 14.30), e‑mail Urban.Maissen@awn.gr.ch
- Christian Nagy, Coordinaziun Projects d'infrastructura Brinzauls, Uffizi da guaud e privels da la natira, tel. +41 81 257 38 74 (cuntanschibel da las 14.00 fin las16.00), e‑mail Christian.Nagy@awn.gr.ch
Responsabladad: Regenza