Ils 31 da december 2022 aveva il chantun Grischun 202 538 abitantas ed abitants permanents, quai èn 1162 persunas dapli ch'il cumenzament da l'onn. En il chantun èn vegnids registrads cleramain dapli mortoris ch'ils onns precedents.
L'augment da la populaziun en il Grischun è stà l'onn 2022 cun 0,58 pertschient vinavant sut la media naziunala (0,88 pertschient). L'onn da rapport han ils chantuns Schaffusa, Friburg e Son Gagl registrà la pli gronda rata da creschientscha. Da l'autra vart è il Giura il chantun che ha nudà il pli pitschen augment da la populaziun durant la medema perioda.
En grondas parts da la Svizra è il saldo da migraziun internaziunal puspè stà il motiv principal per l'augment da la populaziun. Durant l'onn da rapport èn immigradas en Svizra tut en tut 68 760 persunas dapli che emigradas.
Tendenzas regiunalas differentas
AIl pli grond augment da la populaziun hai dà il 2022 en las regiuns grischunas Moesa, Viamala, Landquart e Partenz/Tavau. La populaziun è creschida qua principalmain per lung da las axas principalas da las vals da las regiuns numnadas sco er en ils territoris che cunfineschan directamain cun questa axa. En las regiuns Alvra e Malögia è la populaziun permanenta sa reducida il pli fitg l'onn passà.
Abitantas ed abitants permanents da las regiuns grischunas: midadas procentualas da l'onn 2022 e dumber per ils 31 da december 2022
In sguard sin las 15 vischnancas cun dapli che 3000 abitantas ed abitants mussa, che las vischnancas dad Ilanz/Glion, Maiavilla e Trimmis èn creschidas procentualmain il pli fitg. Entaifer questa gruppa da las pli grondas vischnancas grischunas han Arosa, Scuol, San Murezzan, Domat e Panaduz nudà ina reducziun da la populaziun.
Dapli mortoris tar in dumber da naschientschas tuttina grond
Parallelamain ad in dumber da naschientschas regressiv èn ils mortoris s'augmentads marcantamain il 2022 en il Grischun. Unicamain en las regiuns Plaun e Landquart èn vegnidas registradas dapli naschientschas che mortoris, quai cuntrari a la regiun Surselva che demussa – tranter auter er pervia da la demografia – la pli gronda bilantscha negativa tar il moviment natiral da la populaziun.
Il saldo da migraziun internaziunal da la populaziun grischuna permanenta ha importà l'onn passà tut en tut 1693 persunas. Per la fin da december 2022 avevan pia 19,7 pertschient da la populaziun grischuna ina naziunalitad estra.
Auter sa preschenta la situaziun tar la migraziun interchantunala: dapli abitantas ed abitants èn emigrads en auters chantuns che immigrads da nov en il Grischun. Il pli savens emigreschan giuvnas Grischunas e giuvens Grischuns en scolaziun sco er persunas en giuvens onns da professiun. La pli gronda part da l'immigraziun interchantunala en il Grischun resulta da l'autra vart da las gruppas da la populaziun enturn la vegliadetgna da pensiunament.
Da las vischnancas grischunas profitan Cuira, Ilanz/Glion ed ina gronda part da las vischnancas da la Val dal Rain, dal Signuradi e dal Partenz Davant d'immigraziuns or da las regiuns perifericas ed or da las vischnancas turisticas. Oravant tut Tavau, Vaz, Flem e Laax demussan – en cifras absolutas – la pli gronda emigraziun intrachantunala.
Cumponentas dal svilup da la populaziun en las regiuns grischunas 2022
Damain burgaisas e burgais dal Portugal, dapli da la Germania, da l'Italia e da la Rumenia
Per la fin da l'onn 2022 vivevan 39 852 abitantas ed abitants permanents da naziunalitad exclusivamain estra en il chantun; quai èn 996 dapli che l'onn avant. Entant ch'il dumber da persunas da naziunalitad portugaisa è sa reducì levamain entaifer las gruppas da persunas estras las pli grondas, è s'augmentà il dumber da burgaisas e burgais da la Germania, da l'Italia e da la Rumenia che vivan en il Grischun. 440 persunas che vivan en il chantun, han acquistà l'onn passà il dretg da burgais svizzer.
Ils detagls davart la populaziun e davart ils svilups demografics da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'Uffizi per economia e turissem (guardar Statistik und Register).
Infurmaziuns:
Luzius Stricker, manader da la partiziun Statistica e registers, Uffizi per economia e turissem, tel. +41 81 257 23 74 (cuntanschibel per telefon mo sporadicamain), e‑mail Luzius.Stricker@awt.gr.ch
Responsabladad: Uffizi per economia e turissem