Barbara Gabrielli, la manadra da l'Uffizi da cultura, banduna l'administraziun chantunala per la fin da fanadur 2024 e sa deditgescha a novas sfidas.
En la furma organisatorica actuala exista l'Uffizi da cultura dapi circa 20 onns. Durant ils ultims 15 onns ha Barbara Gabrielli influenzà fermamain il svilup e la stabilisaziun da quest uffizi. La decisiun da bandunar l'uffizi per la fin da fanadur 2024 è ina decisiun bain ponderada e per ella il dretg mument.
Barbara Gabrielli enconuscha fitg bain la scena da cultura. Da segirar ed intermediar l'ierta culturala e linguistica e da colliar la lavur culturala la stattan a cor gist uschia sco la realisaziun da numerus projects innovativs e strategics. Cun sia gronda savida spezialisada e cun sia voluntad concepziunala marcanta ha ella sviluppà – en il rom da la promoziun da la cultura – concepts da mussavia, ma er realisà mesiras concretas entaifer l'uffizi. Tar ses gronds merits tutgan per exempel il Concept per promover la cultura, il Model per la promoziun dal film sco er mesiras en il sectur da la promoziun da las linguas. En spezial ha ella fatg avanzar la digitalisaziun entaifer l'uffizi. Tranter auter èn uschia vegnids sviluppads ina plattafurma da museums sco er in portal per bains culturals audiovisuals u vegnida pussibilitada la cataloghisaziun digitala d'inventaris da collecziuns e da chats archeologics. Plinavant ha ella inizià la creaziun d'in archiv per cultura architectonica.
Finiziun suenter la terminaziun da projects impurtants
Cun lantschar il portal da cultura la primavaira 2024 vegn Barbara Gabrielli a realisar ina gronda visiun ed ina finamira persunala. Cun quest portal online vegn la cultura multifara dal Grischun rendida visibla e perceptibla e l'intermediaziun da l'ierta culturala e linguistica e da la lavur culturala en il chantun vegn sustegnida e promovida. Cun la realisaziun dal portal e cun la terminaziun d'ulteriurs gronds projects sco il Concept per promover la cultura èsi per Barbara Gabrielli il dretg mument da sa deditgar a novas sfidas. «Durant ils ultims 15 onns n'hai jau strusch vesì in auter chantun, en il qual la libertad creativa ed il sustegn politic per la cultura èn uschè gronds sco en il Grischun. Per questa bainvulientscha e per la stima da nossa lavur sun jau fitg engraziaivla. Ina part da mia lavur ch'è qua spezialmain enritginta è la collavuraziun cun las persunas che lavuran sin il champ cultural e cun mes team», onurescha Barbara Gabrielli la lavur en il Grischun.
La Regenza deplorescha la decisiun da Barbara Gabrielli da bandunar l'uffizi. Ella engrazia a Barbara Gabrielli per ses grond engaschament persunal. «Ses projects realisads, sia savida spezialisada profunda e sia signatura, sco il portal da cultura digital, vegnan ad influenzar essenzialmain er vinavant ils fatgs culturals en il chantun», è persvadì il cusseglier guvernativ Jon Domenic Parolini. La Regenza giavischa a Barbara Gabrielli tut il bun sin sia ulteriura via professiunala e ch'ella possia far valair sia forza creativa cun success er en futuras activitads.
La plazza da manadra u manader da l'uffizi vegn publitgada.
Infurmaziuns:
- Cusseglier guvernativ dr. Jon Domenic Parolini, tel. +41 81 257 27 01 (cuntanschibel da las 10.30 fin las 11.00), e‑mail Jondomenic.Parolini@ekud.gr.ch
- Barbara Gabrielli, manadra da l'Uffizi da cultura, tel. +41 81 257 48 01 (cuntanschibla da las 10.30 fin las 12.00), e‑mail Barbara.Gabrielli@afk.gr.ch
Responsabladad: Departament d'educaziun, cultura e protecziun da l'ambient