Oz è il mund sin visita en il Grischun. Il president dal Cussegl naziunal Martin Candinas ha envidà las ambassaduras ed ils ambassadurs da l'exteriur en Svizra ad in viadi d'exploraziun en il Grischun. La Regenza grischuna retschaiva oz la delegaziun da var 80 persunas en il Center da furmaziun e cussegliaziun agricula Plantahof a Landquart..
Il viadi che las diplomatas ed ils diplomats accreditads en Svizra fan en il Grischun, stat sut l'ensaina da la diversitad. Il chantun Grischun n'è betg mo enconuschent sin l'entir mund sco lieu turistic e sco plazza economica da numerus concerns internaziunals, mabain vala er sco lieu ideal per cumbinar e giudair da maniera armonica la lavur e la vita. Uschia maina il viadi las ambassaduras ed ils ambassadurs sco emprim tar la firma Hamilton a Domat, l'interpresa per tecnica medicinala ch'è activa sin l'entir mund. Suenter suonda ina visita dal vitg idillic da Heidi a Maiavilla.
Retschaviment uffizial da la Regenza
La tura finescha cun in retschaviment uffizial da la Regenza grischuna, represchentada tras il vicepresident da la Regenza Jon Domenic Parolini e tras il cusseglier guvernativ Marcus Caduff, en il Center da furmaziun e cussegliaziun agricula Plantahof. Sco instituziun da furmaziun e da cussegliaziun agricula n'ha il Plantahof betg mo ina posiziun predominanta en la Svizra tudestga, mabain derasa sia attracziun sco center da cumpetenza agrar sin l'entir mund.
L'arrivada dals giasts da tut il mund vegn accumpagnada da sunatibas sco er d'in pled da bainvegni dal cusseglier guvernativ Jon Domenic Parolini. In apero ed ina tschaina cuminaivla porschan lura l'occasiun da promover il dialog in cun l'auter e da crear raits da contacts en in rom informal.
Fotografias agiuntadas:
Ils Servetschs dal parlament accumpognan fotograficamain la visita e mettan a disposiziun ils maletgs uschè svelt sco pussaivel sin www.media-parl.ch. Sco funtauna èsi d'inditgar «© Servetschs dal parlament / Yoshi Kusano».
Infurmaziuns:
Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
Responsabladad: Regenza